मंचर : श्रावण महिना सुरू झाल्याने श्रीक्षेत्र भीमाशंकर येथे भाविकांची मोठी गर्दी होत असून, गर्दी वाढल्याने दर्शन व्यवस्थेअभावी भाविकांना पाच ते सहा तास रांगेत उभे राहावे लागत आहे. गाभाऱ्या प्रमाणे सभामंडपाची क्षमता वाढविण्यासह दर्शन व्यवस्था अधिक विस्तारित करण्याची मागणी भाविकांकडून होत आहे. श्रावणाच्या पहिल्याच काही दिवसांत अशी परिस्थिती निर्माण झाल्याने भाविकांची ससेहोलपट झाली.

कुंभमेळ्याच्या पार्श्वभूमीवर भीमाशंकर येथे विविध विकासकामे सुरू आहेत .मंदिर परिसरातील सभामंडपाचे काम झाले असले, तरी भाविकांची वाढती संख्या लक्षात घेता त्याची क्षमता पुरेशी नसल्याचे दिसून येत आहे. गाभाऱ्याची रचनाही पूर्वीप्रमाणेच असल्याने दर्शनासाठी मोठ्या रांगा लागत आहेत. त्यामुळे गाभाऱ्या प्रमाणे सभामंडपाची क्षमता वाढविण्यासह दर्शन व्यवस्था अधिक विस्तारित करण्याची मागणी भाविकांकडून होत आहे.

श्रावण महिन्यात स्थानिक पुजाऱ्यांकडून पूजा व अभिषेक सुरू असल्याने शिवलिंगाजवळ दर्शन घेण्यास अधिक वेळ लागत असल्याचे सांगण्यात येते. त्यामुळे मंदिर प्रशासनाने बाहेरून मुखदर्शनाची स्वतंत्र व्यवस्था सुरू करावी, अशी मागणी होत आहे. पूजा-अभिषेकाची प्रक्रिया नियंत्रित करून भाविकांना जलद दर्शन मिळण्याची गरज आहे. पाच ते सहा तास रांगेत उभे राहावे लागत असल्याने काही भाविक दर्शन न घेताच माघारी फिरत असल्याचे चित्र आहे. श्रावण महिन्यात गर्दी वाढल्याने परिस्थिती आणखी गंभीर होण्याची शक्यता आहे.

माजी गृहमंत्री दिलीप वळसे पाटील यांनी प्रत्यक्ष भीमाशंकर येथे भेट देऊन पाहणी करावी, अशी मागणी अमरनाथ सेवा संघाचे संस्थापक सुर्यकांत धायबर आणि भाविकांनी केली आहे. भविष्यातील वाढती गर्दी लक्षात घेता दर्शन व्यवस्था, रांगेचे नियोजन आणि आवश्यक सुविधा तातडीने सुरळीत करण्याची गरज आहे.

दर्शनासाठी पाच ते सहा तास रांगेत उभे राहावे लागत आहे.वृद्ध, महिला आणि लहान मुलांचे मोठे हाल होत आहेत.मंदिर प्रशासनाने गर्दीचे योग्य नियोजन करून मुखदर्शनाची स्वतंत्र व्यवस्था तातडीने सुरू करावी.
-कमलेश वळसे-पाटील, नागरिक, निरगुडसर.