नवी दिल्ली – दिल्लीतील बाटला हाऊस एन्काऊंटरला १७ वर्षे झाल्यानिमित्त जामिया मिलिया इस्लामिया येथे निषेध मोर्चा काढण्याचा प्रयत्न करणाऱ्या अनेक विद्यार्थ्यांना पोलिसांनी शुक्रवारी ताब्यात घेतले. ऑल इंडिया स्टुडंट्स असोसिएशनच्या (एआयएसए) बॅनरखाली हा मोर्चा काढण्यात आला होता.

एआयएसएने आरोप केला आहे की ही अटक जबरदस्ती करण्यात आली असून हे एक अपहरण आहे. संघटनेने म्हटले आहे की महिला विद्यार्थ्यांसह सुमारे २० विद्यार्थ्यांना कॅम्पसमधून जबरदस्तीने बाहेर काढण्यात आले आणि गेट क्रमांक ७ वर तैनात असलेल्या पोलिस कर्मचाऱ्यांच्या स्वाधीन करण्यात आले.

या संघटनेने विद्यापीठ प्रशासनावरही आरोप केला असून त्यांचे अधिकाऱ्यांशी संगनमत असल्याचे म्हटले आहे. एआयएसएच्या निवेदनात म्हटले आहे की ताब्यात घेण्यात आलेल्यांमध्ये एआयएसए दिल्लीचे प्रदेशाध्यक्ष सय्यद इश्फाक, जामिया सचिव सौरभ आणि इतर दोन विद्यार्थी नेत्यांचा समावेश आहे. २००८ च्या बाटला हाऊस एन्काऊंटरची न्यायालयीन चौकशी ही त्यांची एकमेव मागणी असल्याचे संघटनेचे म्हणणे आहे.

आग्नेय दिल्लीचे डीसीपी हेमंत तिवारी यांनी एआयएसएचे आरोप फेटाळून लावले. त्यांनी सांगितले की, कार्यकर्ते जामियाच्या गेट क्रमांक ७ मधून बाहेर पडले आणि खलीलुल्लाह मशिदीकडे कूच करू लागले. पोलिसांनी त्यांना अनेक वेळा समजावण्याचा प्रयत्न केला, परंतु त्यांनी मागे हटण्यास नकार दिला. त्यामुळे त्यांना कारवाई करावी लागली.

डीसीपी म्हणाले, योग्य इशारा आणि खबरदारीच्या उपाययोजनांनंतरच त्यांना ताब्यात घेण्यात आले. कोणत्याही विद्यार्थ्याला शक्तीप्रयोग करून नेण्यात आले नाही. १९ सप्टेंबर २००८ रोजी दिल्लीच्या बाटला हाऊस परिसरात पोलिस आणि कथित दहशतवाद्यांमध्ये चकमक झाली होती.

या घटनेत आतिफ अमीन आणि मोहम्मद साजिद हे दोन तरुण मारले गेले. तेव्हापासून, ही चकमक वादात सापडली आहे आणि वेळोवेळी चौकशीची मागणी केली जात आहे.