Praniti Shinde wealth ।  देशातील पहिल्या टप्प्यातील निवडणुकांच्या मतदानाला आज सुरुवात झाली. त्यातच, दुसऱ्या टप्प्यातील उमेदवारांचा अर्ज भरण्यासाठी काल अंतिम मुदत असल्याने मोठ्या संख्येने उमेदवारांनी अर्ज दाखल करण्यात आले. त्यानंतर, आज सर्वच इच्छुक उमेदवारही अर्ज भरुन आपली उमेदवारी निश्तिच करणार आहेत. उमेदवारांनी अर्ज दाखल केल्यानंतर नामनिर्देशन पत्रासोबत आपल्या संपत्तीचे विवरणपत्रही जोडले आहे. सोलापूरमधील काँग्रेस उमेदवार आणि आमदार प्रणिती शिंदे यांनीही  शक्तीप्रदर्शन करत आपला उमेदवारी अर्ज दाखल केला. त्यानंतर, त्यांचीही एकूण संपत्ती जनतेसमोर आली आहे.

प्रणिती शिंदेंकडे 6 कोटींची मालमत्ता Praniti Shinde wealth ।

आमदार प्रणिती शिंदे यांनी निवडणूक आयोगाला सादर केलेल्या प्रतिज्ञापत्रानुसार त्यांच्याकडे सध्या 6 कोटी 60 लाख 70 हजार 402 रुपयांची मालमत्ता आहे. 2019 च्या तुलनेत त्यांच्या संपत्तीत पाच वर्षांत 1 कोटी 81 लाख 42 हजार 192 रुपयांची वाढ झाल्याचं दिसून येत आहे.

शहर मध्य विधानसभा मतदारसंघातून सलग तीनवेळा निवडून आलेल्या आमदार प्रणिती शिंदे यांच्या नावे 2019 मध्ये चार कोटी 79 लाख 27 हजार 210 रुपयांची मालमत्ता होती.तर, 2024 मध्ये त्यांच्या नावे सहा कोटी 60 लाख 70 हजार 402 रुपयांची मालमत्ता, संपत्ती असल्याचे त्यांनी निवडणूक निर्णय अधिकाऱ्यांना दिलेल्या प्रतिज्ञापत्रातून स्पष्ट होते.

विशेष बाब म्हणजे आपल्या नावे एकही दुचाकी, चारचाकी नसल्याचेही त्यांनी त्यात नमूद केले आहे. 2019 च्या तुलनेत त्यांची बँकांमधील ठेवी तथा रक्कम जवळपास 30 लाख रुपयांनी कमी झाली आहे. आमदार प्रणिती शिंदे यांच्या नावे कोणत्याही बँकेचे कर्ज नसल्याचे दिसून येते.

बँक अन् पोस्टातील गुंतवणूक Praniti Shinde wealth ।
प्रणिती यांच्याकडे 300 ग्रॅम सोन्याचे दागिने असून त्यांच्या नावे 5 एकर 70 गुंठे जमीन आहे. त्यांची शेअर्समधील गुंतवणूक जवळपास 12 लाख रूपये एवढी आहे. बँका आणि पोस्ट खात्यातील ठेवींची एकूण रक्कम 99.51 लाख रुपये असून आमदार प्रणिती शिंदेंच्या नावावर एकही वाहन नाही. तर, एक रुपयांचे कर्जही त्यांनी घेतलेले नाही. दरम्यान, मुंबईतील दादर आणि सोलापूर येथे त्यांच्या नावावर एक-एक घर आहे. त्यामुळे, माजी मुख्यमंत्र्यांच्या कन्या असलेल्या प्रणिती शिंदेंची संपत्ती कोट्यवधी रुपयांची असल्याचे निष्पन्न झालं आहे.