Prakash Ambedkar- फुले-शाहू-आंबेडकर यांचे विचार, साहित्य आणि शिक्षण हे मनुवादाच्या विरोधातील असल्याच्या कारणावरून बाजूला करण्याची प्रक्रिया सध्या सुरू असल्याचा आरोप वंचित बहुजन आघाडीचे राष्ट्रीय अध्यक्ष ॲड. प्रकाश आंबेडकर यांनी केला. ‘हिटलरने ज्यांना बॅन करायचे होते, त्यांना अँटी-जर्मन ठरवून बंदी घातली. त्याच पद्धतीची विचारसरणी आरएसएसने उचलली आहे.

मात्र, तसे झाल्‍यास रस्‍त्‍यावर उतरून आंदोलनाद्वारे विरोध करू, असा इशारा आंबेडकरांनी पुण्यात शनिवारी (दि. ३) आयोजित पत्रकार परिषदेत दिला आहे. ॲड. आंबेडकर म्‍हणाले, की शाहू महाराज, महात्मा फुले, डॉ. बाबासाहेब आंबेडकर आणि महात्मा गांधी यांच्या विचारांना मनुवादी व्यवस्थेच्या विरोधातील ठरवून त्यांची समीक्षा करावी. तसेच, ते अभ्यासक्रमातून वगळण्याची भूमिका पंतप्रधान कार्यालयाने जाहीर केलेल्या एका पत्रकातून समोर आली आहे.

सोशल मीडियावर तशी पोस्ट फिरत आहे. याचा संदर्भ देत ॲड. आंबेडकर यांनी केंद्र सरकारवर टीका केली. ॲड. आंबेडकर म्‍हणाले, की १९७८-७९ च्या काळात महाराष्ट्रात ‘रिडल्स इन हिंदुइझम’ या डॉ. बाबासाहेब आंबेडकर लिखित पुस्तकावरून बाळ ठाकरे यांनी वाद निर्माण केला होता. त्याविरोधात लाखो फुले-शाहू-आंबेडकरी जनतेने रस्त्यावर उतरून सरकारला निर्णय मागे घ्यायला भाग पाडले.

सध्याच्‍या सरकारनेही आपली भूमिका मागे घेतली नाही, तर लोक रस्त्यावर उतरल्याशिवाय राहणार नाहीत. मोहन भागवत यांच्या अल्पसंख्याकांबाबतच्या वक्तव्याचाही संदर्भ दिला. एका बाजूला कैद करण्याचे चालले आहे आणि दुसऱ्या बाजूला अल्पसंख्याकांना कैद करण्याची भाषा नाही, अशी भूमिका भागवत मांडत आहेत. या दुहेरी भाषेपासून लोकांनी सावध राहावे, असे आवाहन आंबेडकरांनी केले.

सध्या भाजप घाबरला असला तरी त्याला योग्य स्वरूप आणि आकार देणारी विरोधकांची एकजूट अद्याप दिसत नसल्याचेही त्यांनी म्हटले. फुले-शाहू-आंबेडकरी विचारांचा हा जो जनसमूह, जेन झी आहे, त्याने आता हे सगळे ताब्यात घेतले पाहिजे आणि नेतृत्व केले पाहिजे. तोच तडजोड न करता उभा राहू शकतो, असे ते म्हणाले.