Sharad Pawar: शरद पवारांची प्रफुल पटेल यांनी घेतली भेट; “10 तारखेनंतर एकत्र बसून चर्चा करू” म्हंटल्याने चर्चांना उधाण
Sharad Pawar: शरद पवार यांनी १० नोव्हेंबरनंतर एकत्र बसून चर्चा करू सांगितल्याने राष्ट्रवादी काँग्रेसचे दोन्ही पक्ष एकत्र येणार का? या चर्चांना उधाण
Sharad Pawar: राष्ट्रवादी काँग्रेस शरद पवार पक्षाचे अध्यक्ष आणि माजी केंद्रीय मंत्री शरद पवार यांना मुंबईतील ब्रीच कँडी रूग्णालयात दाखल करण्यात आले आहे. त्याआधी ते पुण्यातही रूग्णालयातच दाखल होते. या दरम्यान पंतप्रधान नरेंद्र मोदींनीही शरद पवार यांना फोन करून त्यांच्या प्रकृतीची विचारपूस केली होती.
त्यानंतर मुंबईत अजित पवारांच्या राष्ट्रवादी काँग्रेसचे राष्ट्रीय कार्याध्यक्ष प्रफुल पटेल शरद पवारांची भेट घेतली आणि त्यांच्या प्रकृतीची विचारपूस केली. या भेटीदरम्यानचा एक व्हिडिओही समोर आला आहे. ज्यात शरद पवार यांनी 10 तारखेनंतर एकत्र बसून चर्चा करू, असं प्रफुल पटेल यांना सांगितलं. त्यामुळे आता राजकीय वर्तुळात चर्चांना उधाण आले आहे.
प्रफुल्ल पटेल यांच्याआधी काँग्रेस आमदार विश्वजीत कदम यांनी शरद पवारांची ब्रीच कँडी रुग्णालयात जावून भेट घेतल्याची माहिती समोर आली होती. याशिवाय राष्ट्रवादी काँग्रेसचे नेते तथा मंत्री छगन भुजबळ यांनीदेखील ब्रीच कँडी रुग्णालयात जावून शरद पवारांची भेट घेतली आहे. छगन भुजबळ यांनी शरद पवारांच्या तब्येतीची विचारपूस केली आहे.
प्रफुल पटेल यांची प्रतिक्रिया –
“शरद पवार यांना थकवा आल्याने त्यांना पुण्यातल्या रूग्णालयात दाखल करण्यात आलं होतं. त्यानंतर त्यांना मुंबईत आणण्यात आलं. मुंबईत त्यांच्यावर ब्रीच कँडी रुग्णालयात उपचार सुरू आहेत. त्यांची प्रकृती चांगली आहे. त्यांना भेटून मलाही आनंद झाला. राजकारणात काय चाललं आहे त्याची त्यांनी माहिती घेतली. आमची चांगली चर्चा झाली. एक ते दोन दिवसांत त्यांची प्रकृती चांगली होईल आणि ते घरी जातील अशी अपेक्षा आहे,” असं प्रफुल पटेल यांनी सांगितलं.
मोदी आणि शरद पवार यांच्यात झालेल्या फोनवरील संवादाबाबत प्रफुल पटेल म्हणाले की, शरद पवार आणि नरेंद्र मोदी यांचे अनेक वर्षांपासून चांगले राजकीय संबंध आहेत. दोघांनाही एकमेकांबाबत सन्मान वाटतो, आदर वाटतो. शरद पवारांबाबत मोदींना कायमच आदर वाटतो.
तसेच शरद पवारांनाही मोदींबाबत विशेष प्रेम आहे. पंतप्रधान नरेंद्र मोदी यांनी फोन केला होता तर ते योग्यच आहे कारण त्या दोघांचे राजकीय संबंधच तसे चांगले आहेत. असं प्रफुल पटेल यांनी म्हटलं आहे. UPA चं सरकार होतं आणि नरेंद्र मोदी गुजरातचे मुख्यमंत्री होते तेव्हापासून या दोघांचे चांगले संबंध आहे, असेही प्रफुल पटेल यांनी सांगितले.
प्रफुल पटेल यांनी शरद पवारांची भेट घेतल्याने आणि शरद पवार यांनी त्यांना आपण १० नोव्हेंबरनंतर एकत्र बसू असं सांगितल्याने राष्ट्रवादी काँग्रेसचे दोन्ही पक्ष एकत्र येणार का? या चर्चांना पुन्हा एकदा सुरूवात झाली आहे.
हेही वाचा:
