गोकुळच्या अध्यक्षपदासाठी राजकारण तापलं!
मुश्रीफांची सतेज पाटलांना ऑफर

Top 15 News:  कोल्हापूरच्या गोकुळ दूध संघाच्या अध्यक्षपदावरून राजकीय संघर्ष पेटला आहे. निवडणुकीत सतेज पाटील यांच्या समविचारी आघाडीला १३, तर महायुतीला १२ जागा मिळाल्या आहेत. मात्र, अध्यक्ष निवडीसाठी आवश्यक १४ संचालकांचा कोरम पूर्ण होत नसल्याने पेच निर्माण झाला आहे. हा पेच सोडवण्यासाठी महायुती सरकारने चार शासननियुक्त संचालकांना मतदानाचा अधिकार देण्याचा निर्णय घेतला आहे. या निर्णयाला कायदेशीर आव्हान मिळण्याची शक्यता आहे. दरम्यान, मंत्री हसन मुश्रीफ यांनी अध्यक्षपदासाठी सतेज पाटील यांनी फॉर्म्युला द्यावा, अशी ऑफर दिली आहे. त्यामुळे गोकुळचा अध्यक्ष कोण होणार, याकडे लक्ष लागलं आहे.

पायल झांबरे प्रकरणाची सुनेत्रा पवारांकडून दखल;
मुख्यमंत्र्यांशी चर्चा करणार!

पुण्यातील पायल झांबरे मृत्यू प्रकरणाची उपमुख्यमंत्री सुनेत्रा पवार यांनी गंभीर दखल घेतली आहे. त्यांनी पायलच्या आईशी फोनवरून संवाद साधत कुटुंबीयांच्या भावना जाणून घेतल्या. या प्रकरणाचा नियमित आढावा घेत असून तपासाला वेग देण्यासाठी मुख्यमंत्र्यांशी चर्चा करणार असल्याचे त्यांनी सांगितले. तसेच कुटुंबीयांच्या मागण्या मुख्यमंत्र्यांपर्यंत पोहोचवून पाठपुरावा करण्याचे आश्वासन दिले. दरम्यान, पायलच्या माहेरच्या कुटुंबीयांनी सासरच्या मंडळींवर हुंड्यासाठी मानसिक आणि शारीरिक छळ केल्याचा आरोप केला आहे. या प्रकरणी पतीला अटक करण्यात आली असून पुढील तपास सुरू आहे.

गोकुळच्या सत्तासंघर्षात राज ठाकरेंची उडी;
सतेज पाटलांना पाठिंबा!

गोकुळ दूध संघाच्या अध्यक्षपदावरून सुरू असलेल्या वादात आता मनसेप्रमुख राज ठाकरे यांनीही उडी घेतली आहे. शासननियुक्त संचालकांना मतदानाचा अधिकार देण्याच्या महायुती सरकारच्या निर्णयावर त्यांनी टीका केली. गोकुळमध्ये भाजपने रडीचा डाव खेळणं बंद करावं, असा घणाघात त्यांनी केला. समविचारी आघाडीचे १३, तर महायुतीचे १२ संचालक निवडून आले असताना सरकारने पाच संचालकांची नियुक्ती का केली, असा सवालही त्यांनी उपस्थित केला. भाजपमध्ये समजूतदारपणाचा भीषण दुष्काळ असल्याचा टोला लगावत राज ठाकरेंनी सतेज पाटील यांना पाठिंबा दर्शवला आहे.

सोन्याचे दर घसरले, धनत्रयोदशीला ग्राहकांची झुंबड;
पुढे सोने महागणार की स्वस्त होणार?

दिवाळीच्या धनत्रयोदशीला जळगाव आणि नागपूरच्या सुवर्ण बाजारात सोने खरेदीसाठी ग्राहकांची गर्दी पाहायला मिळत आहे. सोन्याच्या दरात एका दिवसात सुमारे ३,५०० रुपयांची, तर चांदीच्या दरात ४ हजार रुपयांची घसरण झाल्याने ग्राहकांना दिलासा मिळाला आहे. यंदा नागपुरात १०० कोटींहून अधिक उलाढालीचा अंदाज आहे. महाराष्ट्रात २५ टन, तर देशभरात १०० ते १२५ टन सोन्याची विक्री होण्याची शक्यता आहे. दरम्यान, २०२७ च्या धनत्रयोदशीपर्यंत सोन्याचे दर २० ते २५ टक्क्यांनी वाढू शकतात, असा अंदाज ॲक्सिस सिक्युरिटीजने व्यक्त केला आहे.

TCS प्रकरणात मोठी घडामोड!
इम्तियाज जलील यांच्याविरोधात गुन्हा दाखल Top 15 News: 

नाशिकच्या TCS लैंगिक छळ आणि धर्मांतर प्रकरणाला नवे वळण मिळाले आहे. एमआयएमचे नेते आणि माजी खासदार इम्तियाज जलील यांच्याविरोधात नाशिक पोलिसांनी गुन्हा दाखल केला आहे. मुख्य आरोपी निदा खान हिला आश्रय दिल्याच्या आरोपावरून ही कारवाई करण्यात आल्याची माहिती आहे. यापूर्वी एमआयएमचे नगरसेवक मतीन पटेल यांचीही एसआयटीने तीन वेळा चौकशी केली आहे. दरम्यान, निदा खानला मदत करणाऱ्यांची भूमिका तपासली जात असून, या प्रकरणात पुढे कोणती कारवाई होते, याकडे लक्ष लागले आहे.

मुश्रीफांचा नवा फॉर्म्युला अमान्य?
४२०० रुपयांच्या मागणीवर राजू शेट्टी ठाम

ऊस दरावरून कोल्हापुरात शेतकरी संघटना आणि कारखानदारांमधील संघर्ष कायम आहे. माजी खासदार राजू शेट्टी यांनी प्रतिटन ४२०० रुपयांच्या मागणीवर ठाम भूमिका घेतली आहे. काही कारखानदारांनी एकरकमी ४ हजार रुपये आणि नंतर २०० रुपये देण्याचा प्रस्ताव दिला होता. मात्र, मंत्री हसन मुश्रीफ यांनी ३९०० रुपये, त्यानंतर १०० रुपये आणि साखरेचा दर ४५ रुपये राहिल्यास आणखी २०० रुपये देण्याचा नवा फॉर्म्युला मांडला. या प्रस्तावावर सविस्तर विचार करावा लागेल, असं शेट्टी यांनी स्पष्ट केलं. कारखानदारांनीही शेतकऱ्यांचं म्हणणं ऐकावं, असा इशाराही त्यांनी दिला.

रडीचा डाव खेळून खलनायकांच्या यादीत जाऊ नका’;
सुषमा अंधारेंचा मुश्रीफांना सल्ला

गोकुळ दूध संघाच्या सत्तासंघर्षावरून राजकीय आरोप-प्रत्यारोप सुरूच आहेत. ठाकरे गटाच्या उपनेत्या सुषमा अंधारे यांनी मंत्री हसन मुश्रीफ यांना सूचक सल्ला दिला आहे. देवेंद्र फडणवीस आणि धनंजय महाडिक यांच्याकडून कोणतीही अपेक्षा नसल्याचा टोला त्यांनी लगावला. मात्र, हसन मुश्रीफ यांच्याबद्दल आदर आणि आपुलकी असल्याचं सांगत, त्यांनी रडीचा डाव खेळून खलनायकांच्या यादीत जाऊ नये, अशी अपेक्षा व्यक्त केली. अंधारे यांच्या या वक्तव्यामुळे गोकुळच्या सत्तासंघर्षातील राजकीय वादाला नवे वळण मिळाले आहे.

 दिवाळीच्या बताशांना महागाईचा फटका;
येवल्यात विक्री मंदावली, कारागीर चिंतेत!

दिवाळीनिमित्त येवला शहरात पारंपरिक पद्धतीने बताशे बनविण्याची लगबग सुरू आहे. आधुनिक तंत्रज्ञानाचा वापर न करता कारागीर विविध आकारांचे बताशे तयार करत आहेत. मात्र, यंदा दुष्काळ, वाढती महागाई आणि ग्राहकांची घटलेली खरेदी यामुळे या व्यवसायावर संकट आले आहे. दिवाळी जवळ आली असतानाही अद्याप ५० टक्के विक्री झालेली नसल्याचे विक्रेत्यांनी सांगितले. त्यामुळे पारंपरिक व्यवसायाचा वारसा जपणाऱ्या कारागिरांना आर्थिक फटका बसण्याची भीती व्यक्त होत आहे.

ऊसदराचा तिढा सोडवण्यासाठी हालचाली;
कारखानदारांना शिवेंद्रसिंहराजेंची दोन दिवसांची मुदत

ऊसाला प्रतिटन ४,५०० रुपये दर मिळावा, या मागणीसाठी सुरू असलेल्या महामार्ग रोको आंदोलनावर तोडगा काढण्यासाठी हालचाली सुरू झाल्या आहेत. गेल्या तीन दिवसांपासून महामार्ग बंद असल्याने नागरिकांची गैरसोय होत आहे. दरम्यान, सार्वजनिक बांधकाम मंत्री शिवेंद्रसिंहराजे भोसले यांनी साखर कारखानदारांना दोन दिवसांची मुदत दिली आहे. सर्व कारखान्यांनी आपली एफआरपी आणि त्यापेक्षा अधिक किती दर देणार, हे स्पष्टपणे जाहीर करावे, अशा सूचना त्यांनी दिल्या आहेत. कारखानदारांची भूमिका स्पष्ट झाल्यानंतर पुढील निर्णय घेतला जाणार आहे.

अमरावतीत सोन्याची मिठाई चर्चेत! किंमत ऐकून व्हाल थक्क;
किलोचा भाव २४ हजार रुपये Top 15 News: 

दिवाळी म्हटलं की मिठाईची गोडी आलीच! पण अमरावतीत सध्या एका खास मिठाईची जोरदार चर्चा सुरू आहे. या मिठाईवर चक्क २४ कॅरेट सोन्याचा वर्ख चढवण्यात आला आहे. ‘स्वर्ण शंख’ असं या मिठाईचं नाव असून तिची किंमत तब्बल २४ हजार रुपये प्रति किलो आहे. उच्च प्रतीचे मामरा बदाम, पिसोरी पिस्ता आणि शुद्ध केशर यांचा वापर करून ही मिठाई तयार करण्यात आली आहे. राजस्थानमधील कुशल कारागिरांनी हाताने बनवलेली ही राजेशाही मिठाई सध्या अमरावतीकरांच्या आकर्षणाचा केंद्रबिंदू ठरत आहे.

चिराग पासवान यांचा भाजपला इशारा;
यूपीच्या सर्व जागा लढवणार?

केंद्रीय मंत्री चिराग पासवान यांनी २०२७ च्या उत्तर प्रदेश विधानसभा निवडणुकीसाठी आक्रमक भूमिका घेतली आहे. जागावाटपाची चर्चा यशस्वी झाली नाही, तर लोक जनशक्ती पार्टी (रामविलास) राज्यातील सर्व ४०३ जागांवर उमेदवार उभे करणार असल्याचा इशारा त्यांनी दिला. वाराणसीत बोलताना त्यांनी केंद्र आणि बिहारमध्ये पक्ष एनडीएसोबत असल्याचे स्पष्ट केले. मात्र, गरज पडल्यास स्वतंत्र निवडणूक लढवण्याची तयारीही दर्शवली. नागालँडमध्ये पक्षाचे दोन आमदार असल्याचा दाखला त्यांनी दिला. त्यांच्या या भूमिकेमुळे भाजपची चिंता वाढण्याची आणि उत्तर प्रदेशच्या राजकारणात नव्या समीकरणांची चर्चा सुरू झाली आहे.

निवडणूक आयोगाचा मोठा निर्णय!
सहा राज्यांत SSR प्रक्रिया सुरू

SIR प्रक्रियेवरून विरोधक आक्रमक असतानाच निवडणूक आयोगाने सहा राज्ये आणि केंद्रशासित प्रदेशांत विशेष संक्षिप्त पुनरीक्षण (SSR) प्रक्रिया सुरू करण्याचा निर्णय घेतला आहे. अरुणाचल प्रदेश, चंदीगड, दादरा-नगर हवेली आणि दमण-दीव, मिझोराम, ओडिशा आणि सिक्कीममध्ये ही प्रक्रिया राबवली जाणार आहे. १ जानेवारी २०२७ ही पात्रता तारीख निश्चित करण्यात आली असून, २१ जानेवारी २०२७ रोजी अंतिम मतदार यादी प्रसिद्ध होईल. १८ वर्षे पूर्ण करणाऱ्या तरुणांना नावनोंदणीसाठी आगाऊ अर्ज करता येणार आहे. तसेच मतदार यादीतील चुका दुरुस्त करणे आणि अपात्र मतदारांची नावे वगळणे, हा या मोहिमेचा उद्देश आहे.

ट्रम्प यांचा इराणला पुन्हा इशारा;
म्हणाले, ‘गरज पडल्यास उद्ध्वस्त करावं लागेल!’

बातमी : अमेरिकेच्या मध्यावधी निवडणुकीतील पराभवानंतरही राष्ट्राध्यक्ष डोनाल्ड ट्रम्प यांचा इराणविरोधातील आक्रमक पवित्रा कायम आहे. ओव्हल ऑफिसमध्ये पत्रकारांशी बोलताना त्यांनी इराणला पुन्हा इशारा दिला. “मला संपूर्ण इराण उद्ध्वस्त करायचा नाही, पण गरज पडल्यास ते करावं लागेल. तुम्हाला लवकरच समजेल,” असं ट्रम्प म्हणाले. अमेरिकेच्या मंजुरीशिवाय इराण आपल्या अणुकार्यक्रमात पुढे जाऊ शकत नसल्याचाही त्यांनी दावा केला. दरम्यान, अमेरिकेच्या निवडणुकीतील पराभवामुळे ट्रम्प यांच्यावर राजकीय दबाव वाढला आहे. अशा परिस्थितीत इराणविरोधात अमेरिकेची पुढील भूमिका काय असेल, याकडे जगाचं लक्ष लागलं आहे.

१५ वर्षीय तन्वी पत्रीची ऐतिहासिक कामगिरी;
युवा ऑलिम्पिकमध्ये रौप्यपदक!

भारताच्या १५ वर्षीय तन्वी पत्रीने युवा ऑलिम्पिक २०२६ मध्ये बॅडमिंटनमध्ये ऐतिहासिक कामगिरी केली आहे. सेनेगलमधील डेकार येथे झालेल्या स्पर्धेत तिने महिला एकेरीत रौप्यपदक पटकावले. यासह युवा ऑलिम्पिकमध्ये बॅडमिंटनचे पदक जिंकणारी ती पहिली भारतीय महिला खेळाडू ठरली. अंतिम सामन्यात तन्वीचा चीनच्या जागतिक ज्युनियर विजेत्या झांग यी शिनकडून १५-२१, २१-१३, २४-२६ असा पराभव झाला. निर्णायक गेममध्ये तन्वी १०-१९ अशी पिछाडीवर होती. मात्र, तिने सलग पाच मॅच पॉइंट्स वाचवत २४-२४ अशी बरोबरी साधली. अखेर झांगने सामना जिंकत सुवर्णपदक पटकावले. तन्वीच्या जिद्दीच्या या खेळीचे सर्वत्र कौतुक होत आहे.

माधुरी दीक्षितच्या लेकासोबत ‘मिस्ट्री गर्ल’;
होणाऱ्या सुनेची चर्चा रंगली! Top 15 News: 

बॉलिवूडची धकधक गर्ल माधुरी दीक्षित नुकतीच प्रसिद्ध फॅशन डिझायनर मनीष मल्होत्राच्या दिवाळी पार्टीत सहभागी झाली होती. पती श्रीराम नेने आणि मुलगा अरिनसोबत तिने हजेरी लावली. मात्र, यावेळी अरिनसोबत आलेल्या एका मिस्ट्री गर्लने सर्वांचे लक्ष वेधून घेतले. सोशल मीडियावर या दोघांचा व्हिडीओ व्हायरल झाला असून, ही तरुणी माधुरीची होणारी सून असल्याच्या चर्चा सुरू झाल्या आहेत. दरम्यान, माधुरीच्या गुलाबी साडीतील मोहक लूकचीही सोशल मीडियावर चर्चा रंगली आहे.