Poultry Industry – वाढलेल्या उष्णतेचा मोठा फटका पोल्ट्री उद्योगाला बसत असून कोंबड्यांची मोठ्या प्रमाणावर मर होत आहे. त्यामुळे पोल्ट्री उत्पादक शेतकऱ्यांना आर्थिक नुकसान सहन करावे लागत आहे. अंडी उत्पादन करणाऱ्या पक्ष्यांचे मृत्यू प्रमाण वाढल्याने चिंता व्यक्त केली जात आहे. अंडी व चिकनचे दर गगनाला भिडले असले तरी खाद्याच्या बाजारभावात झालेल्या वाढीमुळे पोल्ट्रीचालकांना फारसा फायदा होत नाही.

बॉयलर कोंबडी उत्पादक कंपन्यांनी लिफ्टिंग दरात वाढ केल्यामुळे बाजारात चिकनचे दर वाढले आहेत. सध्या बॉयलर चिकन किरकोळ बाजारात २४० ते २६० रुपये प्रतिकिलो दराने विकले जात आहे. अंड्याचे बाजारभाव शेकडा ६५० ते ६६० रुपये होते. सद्यस्थितीत यंदा प्रथमच अंड्यांच्या दरात मोठी वाढ झाली असून शेकडा अंडी ७०० रुपयांच्या पुढे गेली आहेत. त्यामुळे किरकोळ बाजारात अंडी ९६ रुपये डझन दराने उपलब्ध होत असल्याची माहिती कळंब येथील ख्वाजा गरीब नवाज चिकन अँड सेंटरचे इसाक शेख यांनी दिली.

दरम्यान,बकऱ्याच्या मटणालाही मोठी मागणी असून मटणाचे दर ७८० ते ८०० रुपये प्रतिकिलोपर्यंत पोहोचले आहेत, अशी माहिती मंचर येथील उद्योजक शारुफ इनामदार यांनी दिली. अंड्यांचे दर वाढले असले तरी अंडी उत्पादक शेतकऱ्यांना अपेक्षित नफा मिळत नसल्याचे चित्र आहे. सोयाबीन व मक्याच्या दरात झालेल्या वाढीमुळे उत्पादन खर्च मोठ्या प्रमाणावर वाढला आहे. त्यामुळे अंडी उत्पादक शेतकरी गोविंद थोरात, निकेतन दैने आणि माया शंकर थोरात यांनी शेतकऱ्यांचा नफा कमी झाल्याची खंत व्यक्त केली आहे.

“अंड्यांचे दर वाढले असले तरी मका, सोयाबीन व खाद्यपदार्थांच्या वाढत्या किमतींमुळे उत्पादन खर्च प्रचंड वाढला आहे. उष्णतेमुळे कोंबड्यांचा मृत्यू होण्याचे प्रमाण वाढल्याने दरवाढीचा अपेक्षित फायदा उत्पादकांना मिळत नाही.”
– प्रमोद हिंगे पाटील,उर्जा फूड्स अँड ऍग्रो प्रायव्हेट लिमिटेड, निरगुडसर.