Political News : कल्याणमधील एका अत्यंत वादग्रस्त आणि संवेदनशील जमीन व्यवहार प्रकरणात (Political News) शिवसेना (शिंदे गट) चे माजी नगरसेवक तथा उपशहरप्रमुख सुनील वायले यांच्यासह सात जणांविरुद्ध खडकपाडा पोलीस ठाण्यात गुन्हा दाखल करण्यात आला आहे.

मयत व्यक्तीच्या नावे बनावट कागदपत्रे तयार करून अनुसूचित जाती प्रवर्गातील कुटुंबाची फसवणूक केल्याचा आणि त्यांच्यावर अन्याय केल्याचा गंभीर आरोप या तक्रारीत करण्यात आला आहे. या प्रकरणामुळे कल्याणच्या राजकीय (Political News) आणि सामाजिक वर्तुळात प्रचंड खळबळ उडाली आहे.

मयत व्यक्तीला ‘जिवंत’ दाखवून व्यवहार केल्याचा आरोप

खडकपाडा पोलिसांत प्रमोद विश्वनाथ गायकवाड यांनी दिलेल्या अधिकृत तक्रारीनुसार, हा संपूर्ण प्रकार ८ मार्च २०२२ ते १८ जून २०२६ या कालावधीत घडला. उंबडे गावातील एका जमिनीच्या व्यवहारात सर्व आरोपींनी संगनमत करून कट रचला.

धक्कादायक बाब म्हणजे, या व्यवहारासाठी एका मृत व्यक्तीची बनावट घोषणापत्रे (Affidavits) तयार करण्यात आली, त्यांच्या खोट्या सह्या केल्या गेल्या आणि ती मयत व्यक्ती जिवंत असल्याचे भासवून जमीन बेकायदेशीररित्या हस्तांतरित करण्यात आली.

तसेच, फिर्यादी प्रमोद गायकवाड हे अनुसूचित जाती (SC) प्रवर्गातील आहेत हे पूर्णपणे माहित असूनही, आरोपींनी त्यांच्याशी जाणीवपूर्वक अन्यायकारक आणि अपमानास्पद वागणूक दिल्याचा आरोपही तक्रारीत करण्यात आला आहे.

सात जणांवर गुन्हा दाखल   (Political News)

प्रमोद गायकवाड यांच्या तक्रारीवरून खडकपाडा पोलिसांनी अनुसूचित जाती-जमाती अत्याचार प्रतिबंधक कायदा आणि भारतीय न्याय संहितेच्या (BNS) फसवणूक, बनावट दस्तऐवज तयार करणे अशा विविध गंभीर कलमांखाली खालील सात जणांवर गुन्हा दाखल केला आहे:
१. सुनील राजाराम वायले (माजी नगरसेवक व उपशहरप्रमुख, शिंदे सेना)
२. निर्मला रविकांत वायले
३. अलका मनोहर वायले
४. किसान नधू वायले
५. शिरीष ढवकी
६. सुनील मोहनदास हीरचंदानी
७. जिगी लालचंदानी

पोलीस तपास सुरू

गुन्हा दाखल होताच खडकपाडा पोलिसांनी या प्रकरणाचा सखोल तपास हाती घेतला आहे. “जमीन व्यवहाराशी संबंधित सर्व मूळ कागदपत्रे, खरेदीखत आणि पुराव्यांची अत्यंत बारकाईने छाननी केली जात आहे. तक्रारीतील सर्व बाबींची (Political News) सत्यता पडताळून पाहून पुढील कायदेशीर कारवाई केली जाईल,” अशी माहिती खडकपाडा पोलीस प्रशासनाकडून देण्यात आली आहे.

‘माझ्यावर राजकीय सूडबुद्धीने कारवाई’; सुनील वायले यांचा दावा
दरम्यान, या संपूर्ण प्रकरणावर माजी नगरसेवक सुनील वायले यांनी आपली बाजू मांडताना सर्व आरोप पूर्णपणे फेटाळून लावले आहेत. ते म्हणाले,”आम्हाला राजकीय आणि आर्थिक हेतूने जाणीवपूर्वक या प्रकरणात गोवले जात आहे. आम्ही संबंधित जागा जयंती भोईर यांच्याकडून पूर्णपणे कायदेशीर प्रक्रिया पार पाडून विकत घेतली आहे.

तक्रारदार गायकवाड कुटुंबीयांशी आमचा थेट कोणताही व्यवहार झालेला नाही. आमच्याकडील सर्व कागदपत्रे शंभर टक्के खरी आणि वैध आहेत. या प्रकरणात ॲट्रॉसिटी कायद्याचा गैरवापर केला जात असून, आम्ही या विरोधात न्यायालयात कायदेशीर लढा देऊ.”

वायले यांनी आरोप नाकारले असले, तरी मयत व्यक्तीच्या नावे झालेल्या या कथित व्यवहारामुळे कल्याणमधील जमीन गैरव्यवहारांचा मुद्दा पुन्हा एकदा ऐरणीवर आला आहे. आता पोलीस तपासात नेमकी काय वस्तुस्थिती समोर येते, याकडे सर्वांचे लक्ष लागले आहे.