नियोजन, स्ट्रक्चरल प्लॅन आणि औद्योगिक विकास परवानगीच्‍या कामांना विलंब
PMRDA: पुणे महानगर प्रदेश विकास प्राधिकरणाच्या (पीएमआरडीए) हद्दीतील नियोजन विभागातून स्ट्रक्चरल प्लॅन आणि औद्योगिक विकास परवानगीसह नियोजनाची कामे केली जातात.

येथील महानगर नियोजनकार या एकाच अधिकाऱ्यावर तीन विभागाचा भार सोपविल्‍याने प्रशासकीय कार्यक्षमतेवर प्रश्नचिन्ह निर्माण होत असून, विकास प्रस्तावांच्या मंजुरीची कामे रेंगाळली आहेत. अधिकारी सातत्‍याने मिटिंगला असल्‍याने औद्योगिक बांधकाम परवानगीसह स्ट्रक्चरल प्लॅनची कामे रखडल्याने नागरिकांतून संताप व्‍यक्‍त होत आहे.

पीएमआरडीएच्‍या नियोजन विभागातील अधिकारी महानगर नियोजनकार स्मिता कलकुटकी यांच्‍याकडे स्ट्रक्चरल प्लॅनसह, नियोजन, औद्योगिक कामांचा भार देण्यात आला आहे. प्राधिकरणाच्या मंजूर आकृतिबंधानुसार महानगर नियोजनकार (नियोजन विभाग) हे पद पीएमआरडीएच्या नियोजन विभागकरिता तयार केले असून, प्रसंगी मूळ आकृतिबंधाला छेद देत विकास परवानगी विभागाचा कार्यभार दिला जात आहे.

या पदावर यापूर्वी कार्यरत अनेक महानगर नियोजनकार (नियोजन) यांना कधीच विशेष वागणूक देण्यात आली नव्हती. स्ट्रक्चर प्लॅनचे कामकाज विशिष्ट मर्यादेत पूर्ण करावयाचे असल्याने नगररचना अधिकारी तथा महानगर नियोजनकार (नियोजन) यांना विकास परवानगी विभागाचा कार्यभार देणे म्हणजे नगर नियोजनासंबंधी डोळेझाक केले जात असल्‍याची स्थिती आहे.

औद्योगिक प्रकल्पांशी संबंधित प्रस्तावांची कामे घेऊन नागरिक या विभागात येतात. मात्र, अधिकारी सातत्‍याने मिटिंगमध्ये असल्‍याचे सांगून त्यांना वेटिंगला ठेवले जाते. सकाळी आलेल्या नागरिकांना सायंकाळी सात ते आठ वाजेपर्यंत थांबावे लागते, तरीही काम न झाल्‍यास अनेकांना पुन्‍हा दुसऱ्या दिवशी हेलपाटे मारावे लागल्याने नागरिक संतप्‍त भावना व्‍यक्‍त करत आहेत.

त्‍यामुळे या अधिकाऱ्यांवरील भार कमी करून औद्योगिक परवानगीसह स्ट्रक्चरल प्लॅनचे काम इतर अधिकाऱ्यांकडे सोपविण्याची मागणी होत आहे. याबाबत आयुक्‍त डाॅ. अभिजीत चौधरी, महानगर नियोजनकार स्मिता कलकुटकी यांच्‍याशी प्रतिक्रियेसाठी संपर्क साधला असता, संपर्क झाला नाही.