पिंपरी – दिवाळीच्या सुट्यांमध्ये कुटुंबीयांसह पर्यटनाचा आनंद लुटण्यासाठी नागरिकांची लगबग सुरू झाली आहे. या पार्श्वभूमीवर पुणे महानगर परिवहन महामंडळाच्या (पीएमपीएमएल) पर्यटन बससेवेचा लाभ घेण्याचे आवाहन महामंडळाने केले आहे.

पुणे आणि परिसरातील धार्मिक, ऐतिहासिक तसेच निसर्गरम्य पर्यटनस्थळांना भेट देण्यासाठी वातानुकूलित इलेक्ट्रिक बसची सुविधा उपलब्ध करून देण्यात आली आहे. विशेष म्हणजे, प्रति प्रवासी केवळ ५०० रुपये तिकीटदर असल्याने नागरिकांना किफायतशीर दरात पर्यटनाचा आनंद घेता येणार आहे.

दर शनिवार, रविवार आणि सार्वजनिक सुट्टीच्या दिवशी ही सेवा उपलब्ध असून, प्रवाशांच्या मागणीनुसार इतर दिवशीही बससेवा पुरविण्यात येणार आहे.

पिंपरी-चिंचवड शहरातील नागरिकांसाठी या पर्यटन बससेवेतून अनेक धार्मिक स्थळांना भेट देण्याची संधी उपलब्ध आहे. रावेत येथील इकॉर्न मंदिर, चिंचवडमधील मोरया गोसावी मंदिर, देहूतील गाथा मंदिर आणि भंडारा डोंगराच्या पायथ्याशी जाणाऱ्या पर्यटन मार्गाचा यामध्ये समावेश आहे.

याशिवाय भोसरीमार्गे चाकण, राजगुरुनगर, आळंदी येथील संत ज्ञानेश्वर महाराज समाधीस्थळ आणि गजानन महाराज मठ अशा ठिकाणांनाही भेट देता येणार आहे.

पुणे स्टेशन, स्वारगेट आणि भोसरी बसस्थानक येथून पर्यटन बससेवेचे आरक्षण करता येणार आहे. त्यामुळे शहरातील नागरिकांना स्वतःचे वाहन न वापरता धार्मिक आणि पर्यटनस्थळांची सफर करता येणार आहे.

प्रवाशांचा प्रवास आरामदायी आणि माहितीपूर्ण व्हावा, यासाठी प्रत्येक पर्यटन बसमध्ये मार्गदर्शक सेवकाची नियुक्ती करण्यात येणार आहे. पर्यटनस्थळांची माहिती तसेच मार्गदर्शन या सेवकांकडून केले जाणार आहे. बसच्या आसनक्षमतेनुसार ३३ प्रवाशांचा संपूर्ण गट आरक्षित केल्यास पाच प्रवाशांच्या तिकीटदराइतकी १०० टक्के सवलत देण्यात येणार आहे.

एखाद्या दिवशी प्रवाशांचा अपुरा प्रतिसाद मिळाल्यास किंवा अपरिहार्य कारणामुळे बससेवा रद्द झाल्यास प्रवाशांना पुढील आठवड्यातील शनिवार, रविवार किंवा सार्वजनिक सुट्टीच्या दिवशी प्रवास करता येणार आहे. दिवाळीच्या सुट्यांमध्ये सहकुटुंब पर्यटनाचा आनंद घेण्यासाठी नागरिकांनी या सुविधेचा लाभ घ्यावा, असे आवाहन पीएमपीएमएल प्रशासनाने केले आहे.

– प्रति प्रवासी ५०० रुपये तिकीटदर; वातानुकूलित इलेक्ट्रिक बसमधून पर्यटनाची संधी.
– रावेत, चिंचवड, देहू, भंडारा डोंगर आणि आळंदीच्या धार्मिक स्थळांना भेट देण्याची सुविधा.

पर्यटन बससेवेची महत्त्वाची माहिती

– तिकीटदर : प्रति प्रवासी ५०० रुपये.
– सेवेचे दिवस : शनिवार, रविवार, सार्वजनिक सुट्टी तसेच मागणीनुसार इतर दिवस.
– बुकिंग केंद्रे : पुणे स्टेशन, डेक्कन जिमखाना, स्वारगेट, कात्रज, हडपसर गाडीतळ, भोसरी बसस्थानक, निगडी आणि मनपा भवन.
– बुकिंग संपर्क : पीएमपीएमएल मध्यवर्ती पास विभाग – ०२०-२४५०३२३६.
– विशेष सवलत : ३३ प्रवाशांचा पूर्ण गट आरक्षित केल्यास पाच प्रवाशांच्या तिकीटदराइतकी १०० टक्के सवलत.

Pimpri-Chinchwad : देशातील पहिल्या पाच स्वच्छ शहरांत पिंपरी-चिंचवडची झेप; राष्ट्रपती द्रौपदी मुर्मू यांच्या हस्ते गौरव