PMPML Parking – विश्रांतवाडी, मुंढवा चौक, मार्केट यार्ड ते सेव्हन लव्हज चौक, गोळीबार मैदान, घोरपडी ब्रिज, मगरपट्टा परिसरातील सार्वजनिक वाहतूक व्यवस्था, प्रस्तावित कॉरिडॉर, डबल डेकर टनेल तसेच पीएमपीएलच्या नवीन बसेससाठी पार्किंगसाठी जागा उपलब्ध करून देण्याच्या नियोजनाबाबत सविस्तर चर्चा करण्यात आली. या ठिकाणी वाढत्या वाहतूक कोंडीचा विचार करून तातडीने प्राधान्यक्रम ठरवून प्रकल्प राबवावेत, अशा स्पष्ट सूचना विभागीय आयुक्त डॉ. चंद्रकांत पुलकुंडवार यांनी दिल्या. पुणे एकीकृत महानगर परिवहन प्राधिकरण समितीची आढावा बैठक विभागीय आयुक्त कार्यालयात झाली. पुणे आणि पिंपरी-चिंचवड शहरातील वाढत्या वाहनसंख्येमुळे निर्माण होणाऱ्या वाहतूक समस्यांवर समन्वयाने उपाययोजना करण्यावर भर देण्यात आला. विविध यंत्रणांमध्ये समन्वय वाढवून वाहतूक नियोजन सुसूत्र करण्याची गरज असल्याचे मत बैठकीत व्यक्त करण्यात आले. डॉ. पुलकुंडवार यांनी सांगितले की, ज्या भागांमध्ये नियमितपणे वाहतूक कोंडी निर्माण होते, त्या ठिकाणांचा वैज्ञानिक पद्धतीने अभ्यास करावा. वाहतुकीचा प्रवाह, वाहनांची संख्या, पीक अवरमधील ताण, सिग्नल व्यवस्थापन, रस्त्यांची रुंदी आणि पर्यायी मार्गांची उपलब्धता यांचा सखोल आढावा घेऊनच प्रकल्पांचे सादरीकरण करावे. सर्वेक्षणाधारित नियोजन केल्यास निधीचा कार्यक्षम वापर होईल आणि दीर्घकालीन परिणाम साधता येतील, असे त्यांनी नमूद केले. बैठकीत सार्वजनिक वाहतूक व्यवस्थेला चालना देण्यासाठी बस कॉरिडॉर, मल्टी-लेव्हल पार्किंग, बस टर्मिनस सुविधा आणि पार्क-अँड-राईड संकल्पना राबविण्याबाबतही चर्चा झाली. पीएमपीएलच्या ताफ्यात नव्याने समाविष्ट होणाऱ्या बसेससाठी स्वतंत्र व पुरेशी पार्किंग जागा उपलब्ध करणे अत्यावश्यक असल्याचे अधोरेखित करण्यात आले. तसेच, प्रस्तावित डबल डेकर टनेल प्रकल्पाबाबत प्राथमिक आराखड्याचा आढावा घेण्यात आला. वाहतूक कोंडी कमी करण्यासाठी उड्डाणपूल, अंडरपास, सिग्नल समन्वय प्रणाली आणि स्मार्ट ट्रॅफिक मॅनेजमेंट यंत्रणा अधिक प्रभावीपणे राबविण्याबाबतही सूचना देण्यात आल्या.बैठकीला पिंपरी-चिंचवड मनपा आयुक्त श्रावण हर्डीकर, जिल्हाधिकारी जितेंद्र डुडी, पुणे महानगर प्रदेश विकास प्राधिकरणाचे अतिरिक्त आयुक्त दीपक सिंगला, अपर पोलीस आयुक्त मनोज पाटील, महापालिकेचे अपर आयुक्त पृथ्वीराज बी. पी. उपस्थित होते. तसेच, पुणे महानगर प्रदेश विकास प्राधिकरणाचे आयुक्त योगेश म्हसे दूरदृश्य प्रणालीद्वारे सहभागी झाले होते.
