पुणे : ‘छत्रपती शिवाजी महाराज महाराजस्व अभियान’ अंतर्गत राबविण्यात येत असलेल्या ‘सेवा पंधरवाडा’ मोहिमेत बारामती तालुक्यातील सुपा मंडळाने अत्यंत प्रशंसनीय कामगिरी केली आहे. या अभियानाच्या पहिल्या टप्प्यात, म्हणजेच रस्ते उपलब्ध करून देण्याच्या मोहिमेत मंडल अधिकारी व तलाठी आणि ग्रामस्थ यांच्या पथकाने केवळ पाच दिवसांत तब्बल ९६ नवीन रस्ते तयार करून एक आदर्श घालून दिला आहे. याची दखल खुद्द विभागीय आयुक्त डॉ. चंद्रकांत पुलकुंडवार यांनी घेत या गावाला भेट देत महसूल अधिकारी -कर्मचारी आणि ग्रामस्थांचे कौतुक केले. यावेळी उपविभागीय अधिकारी वैभव नावडकर , तहसीलदार गणेश शिंदे, मंडळ अधिकारी हंसध्वज मनाळे आदींसह ग्रामस्थ उपस्थित होते. महसूल कर्मचाऱ्यांच्या या कामगिरीमुळे गावकऱ्यांनी देखील मोठे समाधान व्यक्त केले असून, या भेटीमध्ये विभागीय आयुक्त डॉ. पुलकुंडवार यांनी गावकऱ्यांशी थेट संवाद साधला. आता या रस्त्यांची नोंद गाव नकाशावर आणि अधिकार अभिलेखां मध्ये घेण्यात येत आहे. यावेळी वृक्षारोपण देखील करण्यात आले. या कृतीतून प्रशासनाने पर्यावरण संवर्धनाचा संदेश दिला आहे. छत्रपती शिवाजी महाराज महाराजस्व अभियान आणि सेवा पंधरवड्याच्या माध्यमातून महसूल प्रशासन अधिक लोकाभिमुख, गतिमान आणि पारदर्शक होत असल्याचे सुपा मंडळाच्या या कामगिरीतून सिद्ध झाले आहे.
