PMC News – थकीत मिळकत कराच्या प्रकरणात वारंवार चकरा माराव्या लागत असल्याने संतप्त झालेल्या एका नागरिकाने थेट महापालिकेच्या मिळकतकर विभागाच्या संगणक नोंदणी कार्यालयात स्वतःच्या डोक्याला रिव्हॉल्वर लावून इथेच गोळी मारून घेतो, अशी धमकी दिल्याचा प्रकार शुक्रवारी घडला. भरदुपारी तीनच्या सुमारास गर्दीच्या वेळी घडलेल्या या घटनेमुळे महापालिका भवनात एकच खळबळ उडाली. याप्रकरणी संबंधित व्यक्तीवर गुन्हा दाखल करण्याचे आदेश आयुक्त नवल किशोर राम यांनी पोलीस प्रशासनाला दिले आहेत. त्यानुसार कर संकलन विभागाच्या कर्मचाऱ्यांकडून रात्री उशिरापर्यंत शिवाजीनगर पोलीस ठाण्यात तक्रार देण्याचे काम सुरू होते. महेंद्र लोणकर असे या नागरिकाचे नाव असल्याचे महापालिकेच्या कर संकलन विभागाकडून सांगण्यात आले, तर महिला कर्मचाऱ्यांच्या समोर हा प्रकार घडल्याने या महिला कर्मचारी चांगल्याच घाबरल्या आहेत. काय आहे प्रकरण प्रशासनाकडून देण्यात आलेल्या माहितीनुसार लोणकर यांचे मंगल कार्यालय होते. त्याला व्यावसायिक दराने मिळकतकर आकारण्यात आला होता. मात्र, ते पाडल्यानंतर त्या जागेचा मोकळ्या भूखंडाचा मिळकत कर लावण्यासाठी त्यांनी महापालिकेच्या मिळकत कर विभागाकडे अर्ज केला होता. त्यानुसार प्रस्ताव तयार करून अतिरिक्त आयुक्तांची मान्यताही मिळाली होती. मात्र, प्रत्यक्षात नवीन बिल काढण्याच्या प्रक्रियेदरम्यान काही तांत्रिक कारणांमुळे विविध स्तरावरून प्रस्तावावर नकारात्मक अभिप्राय नोंदविण्यात आला. या विलंबामुळे लोणकर हे वारंवार महापालिका कार्यालयात येत होते, तसेच महापालिकेच्या अभय योजनेत त्यांना थकबाकी भरायची होती. मात्र, शेवटचे दोन दिवस शिल्लक असल्याने त्यांच्याकडून सतत कर संकलन विभागात पाठपुरावा केला जात होता. गुरुवारी दुपारी ते महापालिका भवनातील बिल विभागात गेले असताना, नवीन बिलाबाबत माहिती देणाऱ्या महिला कर्मचाऱ्यांशी चर्चा सुरू होती. त्याच वेळी त्यांनी अचानक कमरेला ठेवलेले पिस्तूल बाहेर काढून थेट स्वतःच्या डोक्याला लावले आणि आता मी गोळी मारून घेऊ का? असे म्हणत संताप व्यक्त केला. हा प्रकार घडताच कर्मचारी व नागरिकांमध्ये घबराट पसरली.घटनेची माहिती मिळताच वरिष्ठ अधिकारी व सुरक्षा कर्मचारी तातडीने घटनास्थळी पोहोचले. उपस्थितांनी लोणकर यांना शांत करून बाजूला नेले. “प्रस्तावावर काही अधिकारी स्तरावरून नकारात्मक अभिप्राय आले होते, तरीही संबंधित व्यक्तीने थेट रिव्हॉल्वर काढून धमकी देणे अत्यंत चुकीचे आहे. याप्रकरणी गुन्हा दाखल करण्याचे आदेश देण्यात आले असून, शस्त्र परवाना जप्त करून रद्द करण्याबाबतही पोलिसांना कळविण्यात येईल.” – नवल किशोर राम, आयुक्त, महापालिका
