Cancer Van Satara – कर्करोगासारख्या दुर्धर आजाराबाबत जनजागृती निर्माण करणे, तसेच नागरिकांची वेळेत तपासणी करून आजाराचे लवकर निदान व्हावे, या उद्देशाने महाराष्ट्र शासनाच्या आरोग्य विभागामार्फत राबविण्यात येणार्‍या महत्त्वाकांक्षी कॅन्सर व्हॅन उपक्रमाच्या सहाव्या टप्प्याचा शुभारंभ सातार्‍यात करण्यात आला. या उपक्रमांतर्गत जिल्ह्यातील गावागावात कर्करोग तपासणी होणार आहे.

या मोहिमेचा शुभारंभ जिल्हा परिषद अध्यक्षा डॉ. प्रिया शिंदे आणि उपाध्यक्ष तथा आरोग्य समितीचे सभापती राजू भोसले यांच्या हस्ते झाला. यावेळी प्रकल्प संचालक विश्वास सिद, समाज कल्याण सभापती ऋषिकेश धायगुडे पाटील,जिल्हा आरोग्य अधिकारी डॉ. महेश खलिपे, जिल्हा शल्यचिकित्सक डॉ. राहुल जाधव तसेच जिल्हा परिषद आणि आरोग्य विभागातील अधिकारी व कर्मचारी उपस्थित होते.

कॅन्सर व्हॅनद्वारे तोंडाचा, गर्भाशयाच्या मुखाचा तसेच इतर प्रकारच्या कर्करोगांची प्राथमिक तपासणी करण्यात येणार आहे. ही व्हॅन सातारा जिल्ह्यातील विविध गावांमध्ये जाऊन नागरिकांची तपासणी करणार असून, संशयित रुग्णांना पुढील उपचार व आवश्यक संदर्भ सेवा उपलब्ध करून दिली जाणार आहे. त्यामुळे कर्करोगाचे लवकर निदान होऊन वेळेत उपचार सुरू करणे शक्य होणार आहे. या तपासणीसाठी स्त्रीरोगतज्ज्ञ, दंतचिकित्सक तसेच इतर तज्ज्ञ डॉक्टरांची सेवा उपलब्ध करून देण्यात आली आहे.

कॅन्सर व्हॅनचा लाभ घ्यावा…
“महाराष्ट्र शासनाने उपलब्ध करून दिलेल्या या महत्त्वाकांक्षी कॅन्सर व्हॅनचा लाभ घ्यावा. नियमित तपासणीमुळे कर्करोगाचे लवकर निदान होऊन गंभीर अवस्था टाळता येते आणि वेळेत उपचार करून रुग्णांचे आरोग्य सुरक्षित ठेवता येते.”
– राजू भोसले, उपाध्यक्ष सातारा जिल्हा परिषद.