PMC Machine Missing – महापालिकेच्या आरोग्य विभागाने सन २०१६-१७ मध्ये सुमारे ९.९८ लाख रुपये खर्चून खरेदी केलेले फूड टेस्टिंग मशिन सध्या प्रयोगशाळेत आढळून येत नसल्याची धक्कादायक बाब समोर आली आहे. या प्रकरणी संबंधित पोलीस ठाण्यात तक्रार दाखल करण्याची प्रक्रिया सुरू असल्याची माहिती पालिका प्रशासनाने दिली आहे.

महापालिकेच्या जुलै महिन्याच्या मुख्यसभेसाठी नगरसेवक महेश वाबळे यांनी या मशिनबाबत लेखी प्रश्न उपस्थित केला होता. त्या प्रश्‍नावर प्रशासनाकडून हे धक्कादायक उत्तर देण्यात आले आहे. या उत्तरानुसार पालिकेच्या आरोग्य विभागामार्फत फूड टेस्टिंग मशिन खरेदीसाठी निविदा प्रक्रिया राबविण्यात आली होती. त्यानुसार सन २०१६-१७ मध्ये फिवेग रॉ-फायबर एक्स्ट्रॅक्शन सिस्टीम कंपनीचे एक फूड टेस्टिंग मशिन ९ लाख ९८ हजार रुपयांना खरेदी करण्यात आले.

हे मशिन संयुक्त प्रकल्पांतर्गत ‘फूड हायजीन अँड हेल्थ लॅबोरेटरी’ या प्रयोगशाळेला वापरासाठी देण्यात आले होते. मात्र, संबंधित प्रयोगशाळेचा करार संपुष्टात आल्यानंतर १ फेब्रुवारी २०१८ रोजी सर्व उपकरणे तत्कालीन व्हेटरनरी सुपरिंटेंडंट यांच्याकडे ताबा यादीसह सुपूर्द करण्यात आली होती. या ताबा यादीमध्ये संबंधित फूड टेस्टिंग मशिनचाही समावेश असल्याचे प्रशासनाने स्पष्ट केले आहे.

पोलिसांत तक्रार करणार
या मशिनबाबत प्रश्न उपस्थित झाल्यानंतर आरोग्य विभागाने दिलेल्या उत्तरात सध्याच्या स्थितीत ताबा यादीची पडताळणी आणि प्रत्यक्ष प्रयोगशाळेची पाहणी केल्यानंतर संबंधित मशिन आढळून आले नाही. त्यामुळे मशिन नेमके कुठे गेले, याबाबत प्रश्नचिन्ह निर्माण झाले असून, याप्रकरणी संबंधित पोलीस ठाण्यात तक्रार दाखल करण्याची प्रक्रिया सुरू असल्याचे प्रशासनाने सांगितले आहे.

मात्र, सार्वजनिक निधीतून खरेदी केलेले महागडे उपकरणच बेपत्ता झाल्याने महापालिकेच्या मालमत्ता व्यवस्थापनावर प्रश्न उपस्थित होत असून, या प्रकरणाची सखोल चौकशी करून जबाबदारांवर कारवाई करणार का, असा प्रश्न या निमित्ताने उपस्थित करण्यात येत आहे.