PM Modi on US-Iran war:  अमेरिका आणि इराण यांच्यात शांतता कराराची घोषणा करण्यात आली आहे. समोर आलेल्या वृत्तानुसार, या करारावर शुक्रवारी स्वित्झर्लंडमध्ये स्वाक्षरी होणार आहे. जगभरातील नेत्यांनी अमेरिका-इराण कराराचे स्वागत केले आहे. पंतप्रधान मोदींनीही संघर्ष संपवण्याच्या निर्णयाचे स्वागत केले.

सोशल मीडियावरील एका पोस्टमध्ये पंतप्रधान मोदींनी,”पश्चिम आशियातील संघर्ष संपवण्यासाठी अमेरिका आणि इराण यांच्यात झालेल्या कराराचे मी स्वागत करतो. या संघर्षामुळे जगभरात गंभीर आर्थिक गोंधळ निर्माण झाला आहे आणि अनेक देशांमध्ये जीवित व मालमत्तेचे नुकसान झाले आहे.” असे त्यांनी म्हटले आहे.

त्यांनी पुढे, “भारताला आशा आहे की या कराराच्या अंमलबजावणीमुळे या प्रदेशात शांतता आणि स्थिरता पुनर्संचयित होण्यास मदत होईल आणि मुक्त संचार व व्यापार सुनिश्चित होईल. आम्हाला आशा आहे की उर्वरित मुद्द्यांवरील वाटाघाटींमुळे एक चिरस्थायी आणि अंतिम तोडगा निघेल.” असे लिहिले.

अमेरिका-इराण शांतता करार PM Modi on US-Iran war: 
तीन महिन्यांहून अधिक काळ सुरू असलेला वाद संपवण्यासाठी अमेरिका आणि इराणने एका आराखडा कराराची घोषणा केली आहे. दोन्ही बाजूंनी पुष्टी केली आहे की, शुक्रवार, १९ जून रोजी स्वित्झर्लंडमध्ये एका औपचारिक सामंजस्य करारावर (एमओयू) स्वाक्षरी होण्याची शक्यता आहे.

असोसिएटेड प्रेसच्या (एपी) वृत्तानुसार, प्रस्तावित करारामध्ये लष्करी कारवाया थांबवणे, होर्मुझची सामुद्रधुनी पुन्हा खुली करणे आणि अमेरिकेची नौदल नाकेबंदी उठवणे यांचा समावेश आहे, तर इराणच्या अणुकार्यक्रमाचा मुद्दा पुढील वाटाघाटींसाठी ठेवण्यात आला आहे. मध्यस्थ म्हणून काम करणाऱ्या पाकिस्तानने जाहीर केले की, लेबनॉनसह सर्व आघाड्यांवर लष्करी कारवाई तात्काळ आणि कायमस्वरूपी थांबवण्यास दोन्ही देशांनी सहमती दर्शवली आहे.

डोनाल्ड ट्रम्प काय म्हणाले? PM Modi on US-Iran war: 

अमेरिकेचे अध्यक्ष डोनाल्ड ट्रम्प यांनी त्यांच्या ‘ट्रुथ सोशल’ या व्यासपीठावर या मोठ्या यशाची घोषणा केली. ते म्हणाले, “इराणसोबतचा करार आता पूर्ण झाला आहे. सर्वांचे अभिनंदन! मी याद्वारे होर्मुझची सामुद्रधुनी मुक्तपणे खुली करण्यास आणि अमेरिकेची नौदल नाकेबंदी तात्काळ उठवण्यास अधिकृत परवानगी देतो. जगभरातील जहाजांनो, आपली इंजिने सुरू करा. तेलाचा प्रवाह सुरू होऊ द्या!”