Piyush Goyal : भारत आणि अमेरिका यांच्यातील अंतरिम व्यापार करारांतर्गत आगामी पाच वर्षांत अमेरिकेतून सुमारे १०० अब्ज डॉलर्सची विमाने, इंजिने आणि सुट्या भागांची आयात होण्याची शक्यता केंद्रीय वाणिज्य आणि उद्योग मंत्री पियुष गोयल (Piyush Goyal) यांनी व्यक्त केली आहे. या निर्णयामुळे देशातील विमान प्रवासाचे दर कमी होतील आणि पर्यटन क्षेत्राला मोठी उभारी मिळेल, असा विश्वास त्यांनी शुक्रवारी व्यक्त केला. दिल्लीत आयोजित ‘ईटी नाऊ ग्लोबल बिझनेस समिट’मध्ये बोलताना गोयल यांनी भारत-अमेरिका द्विपक्षीय व्यापाराच्या नव्या संधींवर प्रकाश टाकला. दोन्ही देशांमधील पहिल्या टप्प्यातील व्यापार कराराच्या आराखड्यानुसार, भारत आगामी पाच वर्षांत अमेरिकेकडून ऊर्जा उत्पादने, विमाने, मौल्यवान धातू आणि कोकिंग कोल (कोळसा) मिळून एकूण ५०० अब्ज डॉलर्सची खरेदी करण्याचा विचार करत आहे. यामध्ये केवळ नागरी विमान वाहतूक क्षेत्रातच १०० अब्ज डॉलर्सची गुंतवणूक अपेक्षित असून, प्रामुख्याने बोईंग विमानांच्या आयातीवर भर दिला जाणार आहे. विमानांची संख्या वाढल्यामुळे देशातील दुर्गम भागांमध्ये कनेक्टिव्हिटी वाढेल आणि प्रवाशांना किफायतशीर दरात विमान प्रवास उपलब्ध होईल, असेही गोयल यांनी नमूद केले. Piyush Goyal विमान वाहतुकीसोबतच भारतीय पोलाद उद्योगाच्या विस्तारासाठी अमेरिकेकडून मिळणारा कोकिंग कोल अत्यंत महत्त्वाचा ठरणार आहे. भारताचे पोलाद उत्पादन १४० दशलक्ष टनांवरून ३०० दशलक्ष टनांपर्यंत नेण्याचे उद्दिष्ट असून, त्यासाठी सुमारे ३० अब्ज डॉलर्सच्या कोळशाची गरज भासणार आहे. सध्या ठराविक देशच कोळशाचा पुरवठा करत असून, अमेरिकेच्या रूपाने नवा पर्याय उपलब्ध झाल्यामुळे स्पर्धेतून दर्जेदार उत्पादन आणि रास्त किंमत मिळण्यास मदत होईल, असे पियुष गोयल यांनी यावेळी स्पष्ट केले. युरोपियन युनियन आणि अमेरिकेसोबतच्या व्यापार करारांमुळे भारतासाठी ५५ ते ६० ट्रिलियन डॉलर्सची प्रचंड बाजारपेठ खुली झाली आहे. हे आंतरराष्ट्रीय करार करताना केंद्र सरकारने भारतीय शेतकऱ्यांच्या हिताचे पूर्णपणे संरक्षण केले असल्याचेही त्यांनी ठामपणे सांगितले.
