Pimpri Chinchwad : पिंपरी चिंचवड महापालिकेत सत्ताधारी भाजपकडून ७ तर राष्ट्रवादी काँग्रेस अजित पवार गटामधून ३ जणांना स्वीकृत नगरसेवकपदी संधी दिली जाणार आहे. मागच्या महिन्यातच याबाबत निर्णय होणार होता. मात्र, भाजपाने मुदत वाढवून घेत एप्रिल महिन्यामध्ये स्वीकृत नगरसेवक नियुक्तीचा निर्णय घेतला होता. मात्र, मंगळवारी झालेल्या सभेत देखील हा विषय तहकूब करण्यात आला. त्यामुळे राष्ट्रवादी काँग्रेसच्या नगरसेवकांनी आक्रमक भूमिका घेतली. आम्ही नावे दिलेली आहे त्यामुळे आमच्या सदस्यांची नियुक्ती करा तुमच्या सदस्यांची जेव्हा करायची तेव्हा करा अशी भूमिका राष्ट्रवादीने घेतली. स्वीकृत नगरसेवकांची नियुक्ती करण्याबाबत वारंवार चालढकल करत भाजप नियुक्ती लांबवत असल्याचे समोर आले आहे. मंगळवारी झालेल्या महासभेत विषय पत्रावर असलेल्या विषयाचे नगरसेवक विनोद नढे यांनी वाचन केले. हा विषय तहकूब करणार असल्याचे लक्षात येताच राष्ट्रवादीच्या नगरसेवकांनी आवाज उठवला. दरम्यान, महापौर रवी लांडगे यांनी हा विषय तहकूब करत असल्याचे जाहीर केले. त्यामुळे आक्रमक झालेल्या राष्ट्रवादी काँग्रेसचा नगरसेवकांनी डायससमोर धाव घेतली. नही चलेगी, नही चलेगी दादागिरी नही चलेगी, अशा घोषणा यावेळी देण्यात आल्या. महापौरांनी आक्रमक झालेल्या नगरसेवकांना शांत राहण्याचे आवाहन केले. मात्र, मोठ्या प्रमाणावर गोंधळ वाढल्याने महापौर लांडगे यांनी १५ मिनिटांसाठी सभा तहकूब केली. आमची नावे आम्हीच देणार विरोधी पक्षनेते भाऊसाहेब भोईर म्हणाले, पुणे महापालिकेमध्ये राष्ट्रवादी काँग्रेसच्या सदस्यांची नियुक्ती झाली आहे. तिथे देखील भाजपचे एकमत झालेले नाही. आमचे एकमत होऊन आम्ही नावे दिली आहेत. रीतसर अर्ज करून ते वैध देखील ठरले आहेत. असे असताना वारंवार हा विषय तहकूब केला जात आहे. भाजपमधील देखील अनेक जण चातकासारखी स्वीकृत नगरसेवक नियुक्तीची वाट पाहत आहेत. हा त्यांच्यावर देखील मोठा अन्याय आहे. एखादे नाव बदलण्यासाठी तुम्ही कसे सांगू शकता? आमची नावे आम्हीच देणार. नाव राहिल्याचा महापौरांचा खुलासा भाजपाच्या गटा-तटाच्या राजकारणामुळे स्वीकृत पदावर कोणाला संधी द्यायची याबाबत एकमत करण्यासाठी तब्बल दोन महिने कालावधी लागला. त्यात अद्याप एकमत झाले नसल्याची कबुली महापौर रवी लांडगे यांनी स्वतःच दिली. आक्रमक झालेल्या राष्ट्रवादीच्या नगरसेवकांना समजावताना लांडगे म्हणाले, बाकी नावं फायनल झाली आहेत, मात्र एक नाव फायनल करायचे राहिले आहे. पुढच्या बैठकीत हा विषय मंजूर करू. Pune District : इंद्रायणी : पावित्र्य की रसायनांचे मरणपाश?