Pimpri Chinchwad Police – पिंपरी-चिंचवड पोलीस आयुक्तालयाने सुरू केलेल्या विशेष मोहिमेंतर्गत विविध भागांत अमली पदार्थांविरोधात धडक कारवाया करण्यात आल्या. २३ जून रोजी करण्यात आलेल्या पाच कारवायांमध्ये पाच जणांना अटक करण्यात आली असून, एक किलोहून अधिक गांजा जप्त करण्यात आला आहे. सर्वात मोठी कारवाई तळेगाव एमआयडीसी पोलीस ठाण्याच्या हद्दीत करण्यात आली.

नवलाख उंबरे-बधलवाडी रस्त्यावरील मुक्ताई मंदिराजवळ दत्ता सोपान बधाले (वय ५८, रा. मावळ) याला पोलिसांनी ताब्यात घेतले. त्याच्याकडून एक किलोपेक्षा अधिक गांजा जप्त करण्यात आला. संत तुकारामनगर पोलीस ठाण्याच्या पथकाने नेहरुनगर येथील अण्णासाहेब मगर स्टेडियमजवळील बंद पडलेल्या हॉस्टेल परिसरात कारवाई करून लक्ष्मण नागनाथ शेटे (वय ३०, रा. पिंपरी) याला गांजासह अटक केली. तो गांजा विक्रीसाठी घेऊन उभा असल्याचे तपासात समोर आले.

रावेत पंपिंग स्टेशनजवळ गुन्हे शाखेच्या युनिट-२ ने सुरजकुमार रामलल्लु गुप्ता (वय ३१, मूळ रा. उत्तर प्रदेश) याला गांजासह पकडले. तर निगडी येथील भक्तीशक्ती चौक अंडरपासमध्ये सार्वजनिक ठिकाणी गांजा विक्री करत असलेल्या संतोष नरेश वाल्मीकी (वय २७) याला निगडी पोलिसांनी अटक केली.

याशिवाय, जुनी सांगवी येथील वेताळबाबा स्मशानभूमी परिसरात गांजाचे सेवन करत असलेल्या रोहित रघुनाथ धुमाळ (वय २१, रा. जुनी सांगवी) याला सांगवी पोलिसांनी ताब्यात घेतले. त्याच्याकडून गांजा सेवनाचे साहित्य जप्त करण्यात आले. या सर्व आरोपींविरुद्ध संबंधित पोलीस ठाण्यांत गुन्हे दाखल करण्यात आले आहेत.