Nasrapur Case: सीसीटीव्हीमधील व्यक्ती मीच, पण…; नसरापूर अत्याचार प्रकरणात आरोपीचा धक्कादायक जबाब

Nasrapur Case – नसरापूर येथे चिमुकलीवर लैंगिक अत्याचार करून तिचा खून केल्याप्रकरणात आरोपी भीमराव कांबळे याचा शुक्रवारी (दि. १९) जबाब नोंदविण्यात आला. त्याला विचारलेल्या ८८ प्रश्नांना नाही, माहिती नाही, मुळीच नाही, अशी उत्तरे देत सर्व आरोप त्याने फेटाळले. विशेष न्यायाधीश एस. आर. साळुंखे यांच्या न्यायालयात हा जबाब नोंदविण्यात आला. याप्रकरणी १६ दिवसांत ५५ साक्षीदारांची साक्ष व उलटतपासणी झाली आहे. शुक्रवारी न्यायालयाने आरोपीस शाबीत झालेले सीसीटीव्ही फुटेज दाखविले.

सुरुवातीला त्याने हे फुटेज नाकारले. मात्र, झूम करून ६ ते ७ वेळा दाखविल्यानंतर सीसीटीव्हीतील व्यक्ती स्वतःच असल्याचे मान्य केले. मात्र, चिमुकली कोण, हे माहिती नसल्याचे सांगून बचावाचा प्रयत्न केला. न्यायालयाने विचारले, की घटनास्थळाकडे जाताना सोबत एक लहान मुलगी दिसत आहे. परतताना एकटाच दिसत आहे, त्या मुलीचे काय झाले? यावर सुरुवातीला त्याने आपल्याला काही माहिती नसल्याचे सांगितले. त्यानंतर घटनेदिवशी साडेअकरा वाजता तो राम मंदिरात गेला होता.

तेथून तो घायवळांच्या शेडमध्ये गेला, तेव्हा तेथे मुलगी आली. तिला गाठीशेव दिली. तिला गोठ्यात नेताना आरोपी पाय घसरून पडल्याने मुलीच्या डोक्याला मार लागला व ती रडू लागली. त्यामुळे तिला कॉटवर झोपविले. लोक आरोप करतील म्हणून तिला तेथेच सोडून काळूबाई मंदिरात कट्ट्यावर जाऊन बसल्याचे त्याने सांगितले.

सरकारी वकील अजय मिसर, सहाय्यक ऍड. सुरेश गायकवाड व ऍड. प्रथमेश शिंगणे व्हिडिओ कॉन्फरसिंगद्वारे न्यायालयात हजर होते. आरोपीतर्फे ऍड. हिम्मतराव सूर्यवंशी, वरिष्ठ पोलीस निरीक्षक राजेंद्र मायने, तपासी अंमलदार विजयमाला पवार आदी उपस्थित होते. मिसर यांनी अंतिम युक्तिवादासाठी उद्या (शनिवारी) तयार असल्याचे सांगितले. त्यास बचाव पक्षानेही होकार दिला.