Pimpri Chinchwad News – पिंपरी-चिंचवड महानगरपालिकेच्या ‘फ’ क्षेत्रीय कार्यालयाच्या हद्दीतील प्रभाग क्रमांक ११ (शाहूनगर-फुलेनगर) आणि प्रभाग क्रमांक १३ (यमुनानगर) परिसरात रस्ता साफसफाईचे काम करणाऱ्या सुमारे २००कंत्राटी स्वच्छता कर्मचाऱ्यांचा सहा महिन्यांपासून वेळेवर पगार मिळत नव्‍हता. आॅगस्‍टमध्ये कर्मचाऱ्यांना वेतन मिळाले नव्‍हते. यामुळे कामगारांवर आर्थिक संकट ओढावले होते.

मनसे कामगार कर्मचारी सेनेच्‍या वतीने या कर्मचाऱ्यांना वेतन मिळवून देण्यासाठी आंदोलन करण्यात आले होते. आंदोलनानंतर अवघ्या २४ तासांत कर्मचाऱ्यांचे वेतन त्‍यांच्‍या खात्‍यात जमा झाले. महाराष्ट्र नवनिर्माण कामगार सेनेचे अध्यक्ष रुपेश पटेकर यांनी सांगितले की, आंदोलनानंतर प्रशासनाने तातडीने कार्यवाही केल्याने कर्मचाऱ्यांना दिलासा मिळाला आहे. गेल्या सहा महिन्यांपासून वेळेवर वेतन मिळत नव्‍हते.

यामुळे कर्मचाऱ्यांवर आर्थिक संकट ओढावले होते. घरखर्च, दैनंदिन गरजा आणि उपजीविकेचा प्रश्न निर्माण झाल्याने कर्मचाऱ्यांमध्ये नाराजी होती. या पार्श्वभूमीवर १९ ऑगस्ट रोजी सकाळी सहा वाजल्यापासून फुलेनगर आणि यमुनानगर येथे मनसेच्या वतीने आंदोलन करण्यात आले. कर्मचाऱ्यांनी कामबंद आंदोलन करत प्रशासनाचे लक्ष वेधले. आंदोलनाची तीव्रता लक्षात घेऊन महापालिकेचे आरोग्य अधिकारी आढाव यांनी घटनास्थळी भेट देत आंदोलकांशी चर्चा केली.

तसेच ‘फ’ क्षेत्रीय अधिकारी तथा सहआयुक्त अतुल पाटील यांच्याशी दूरध्वनीवरून संपर्क साधण्यात आला. आंदोलक कर्मचाऱ्यांसमोरच झालेल्या चर्चेत २४ तासांच्या आत सर्व कर्मचाऱ्यांचे वेतन त्यांच्या खात्यात जमा करण्याचे आश्वासन प्रशासनाकडून देण्यात आले. त्यानंतर सुमारे २०० कर्मचाऱ्यांच्या खात्यावर थकीत वेतन जमा केले. कामगारांच्या हक्कांसाठी आंदोलनाला यश मिळाल्याचा दावा महाराष्ट्र नवनिर्माण कामगार कर्मचारी सेनेचे अध्यक्ष-सचिव रुपेश बाजीराव पटेकर यांनी प्रसिद्धीपत्रकाद्वारे केला आहे.