तेहरान – इराणमधील महागाईने उच्चांक गाठल्यामुळे हवालदिल झालेल्या जनतेने रस्त्यावर उतरून आंदोलन सुरू केले आहे. देशाच्या महत्वाच्या शहरांमध्ये लोकांनी रस्त्यावर उतरून सरकारविरोधी घोषणाबाजी आणि उग्र निदर्शने करायला सुरुवात केल्याचे आज बघायला मिळाले. मध्य इराणमधील इस्फाहन, दक्षिणेकडील शिराझ आणि इशान्य इराणमधील मशहादसह राजधानी तेहरानच्या काही भागांमध्ये ही उग्र निदर्शने झाली. संतप्त जमावाला पांगवण्यासाठी पोलिसांना अश्रुधुराच्या नळकांड्या फोडाव्या लागल्या. इराणचे चलन असलेल्या रियालचे मूल्य नीचांकी पातळीवर पोचले आहे. सोमवारी रियालचे मूल्य प्रति डॉलर १.३८ दशलक्ष इतक्या खालच्या पातळीवर गेले होते. देशातील वाढती महागाई आणि डॉलरच्या तुलनेत इराणी चलनाचे विक्रमी अवमूल्यन झाल्याने इराणच्या सेंट्रल बँकेचे गव्हर्नर मोहम्मद रेझा फरझीन यांनी पदाचा राजीनामा दिला आहे. त्यानंतर लोकांमधील असंतोष आणखी वाढला आणि उग्र निदर्शनांना सुरुवात झाली. आज होत असलेली निदर्शने आणि आंदोलनांचे स्वरुप इतके मोठे आहे, की त्याची तुलना २०२२ साली महसा आमिनी या युवतीचा पोलीस कोठडीत झालेल्या मृत्यूनंतर झालेल्या आंदोलनाशी केली जाऊ लागली आहे. हिजाब व्यवस्थित परिधान न केल्याच्या आरोपाखाली देशातील नैतिक पोलिसांनी आमिनीला ताब्यात घेतले होते. त्यानंतर तिचा कोठडीत मृत्यू झाल्यानंतर जनता संतप्त झाली होती. आजच्या आंदोलनादरम्यान व्यापारी आणि दुकानदारांनीही उत्स्फूर्त बंद पाळला आणि प्रमुख शहरांमधील बाजारपेठा बंद ठेवण्यात आल्या होत्या. व्यापाऱ्यांनी खरेदी-विक्रीचे व्यवहार बंद ठेवले. शेअर बाजारातील व्यवहार देखील बंद ठेवले गेले, असे स्थानिक वृत्तसंस्थांनी म्हटले आहे. दरम्यान गृहमंत्र्यांनी जनतेच्या न्याय्य मागण्या मान्य कराव्यात, अशी सूचना इराणचे अध्यक्ष मसूद पेझेश्कीयान यांनी केली आहे.
