PCMC News – पिंपरी-चिंचवड महापालिकेचे नवनिर्वाचित महापौर रवी लांडगे यांच्या अध्यक्षतेखाली नवीन कार्यकारिणीची पहिली बैठक मंगळवारी पार पडली. दरम्‍यान ‘किवळे पॅटर्न’ची शहरभर चर्चा रंगताना दिसली.नुकत्याच पार पडलेल्या महापालिकेच्या निवडणुकीत सत्ताधारी भाजप तसेच प्रमुख विरोधी पक्ष असलेल्या राष्ट्रवादी काँग्रेसच्या पॅनलच्या उमेदवारांना पराभूत करत प्रभाग क्रमांक १६ मधून शिवसेनेचे निलेश तरस,

रेश्मा कातळे आणि ऐश्वर्या तरस यांनी दणदणीत विजय मिळवला होता. या अनपेक्षित विजयामागील रणनीतीमुळे निवडणुकीदरम्यान ‘किवळे पॅटर्न’ची शहरभर चर्चा झाली होती.या पार्श्वभूमीवर आज झालेल्या महापालिकेच्या सर्वसाधारण सभेत प्रभाग क्रमांक १६ मधील नगरसेवकांनी डोक्यावर फेटा परिधान करून त्यावर ‘किवळे पॅटर्न’ लिहलेले स्टिकर लावून सभागृहात प्रवेश केला.

यामुळे सभागृहातील नूतन नगरसेवक, पदाधिकारी तसेच उपस्थित नागरिकांचे लक्ष वेधले गेले. या प्रकारामुळे सभागृहात उत्सुकता आणि चर्चा पाहायला मिळाली.यावेळी युवा नेते बापू कातळे आणि राजेंद्र तरस हेही यावेळी उपस्थित होते. महापालिकेच्या पहिल्याच बैठकीत महिला नगरसेविकांनी अशा पद्धतीने अप्रत्यक्ष राजकीय संदेश देणारा हा प्रसंग सध्या चर्चेचा विषय ठरला असून, आगामी काळात ‘किवळे पॅटर्न’ शहराच्या राजकारणात नेमकी कोणती भूमिका बजावतो, याकडे सर्वांचे लक्ष लागले आहे.