PCMC News – पिंपरी चिंचवड महापालिकेच्या क क्षेत्रीय कार्यालय, प्रभाग क्रमांक ०६ पांडवनगर, भोसरी येथे स्वच्छ सर्वेक्षण २०२५-२६ संदर्भात नागरिकांना सविस्तर मार्गदर्शन करण्यात आले. या कार्यक्रमात स्वच्छतेचे महत्त्व अधोरेखित करत उपस्थित नागरिकांना स्वच्छतेची सामूहिक शपथही देण्यात आली.

माझे शहर, माझी जबाबदारी या अभियानांतर्गत महापालिकेकडून शहरभर विविध जनजागृती उपक्रम राबवले जात आहेत. यामध्ये भाजी मंडई, रस्त्यावर विक्री करणारे व्यावसायिक, चौक-रस्ते, सिग्नल बस स्थानके तसेच शाळा व महाविद्यालये येथे स्वच्छतेबाबत जनजागृती करण्यात येत आहे.

मी स्वच्छाग्रही, मी कचरा करणार नाही, मी स्वच्छाग्रही, प्लास्टिक ऐवजी कापडी पिशव्यांचा वापर करेल, मी स्वच्छाग्रही, मी माझा परिसर स्वच्छ ठेवेल, मी स्वच्छाग्रही, माझ्या घरातील ओला कचरा, सुका कचरा, घरगुती घातक कचरा व सॅनिटरी कचरा वेगवेगळा करुन घंटा गाडी मधेच देईल अशा प्रकारे नागरिकांना संदेश देत या उपक्रमांद्वारे नागरिक,

व्यापारी व विद्यार्थ्यांमध्ये स्वच्छतेबाबत सकारात्मक बदल घडवून आणण्याचा प्रयत्न होत आहे. अधिकाधिक नागरिकांनी शहर अधिक स्वच्छ व सुंदर करण्यासाठी सर्वांनी सक्रिय सहभाग नोंदवावा, असे आवाहन प्रशासनाने केले आहे.

“स्वच्छता ही प्रत्येक नागरिकांची सामूहिक जबाबदारी आहे. ‘माझे शहर, माझी जबाबदारी’ या भावनेतून नागरिकांनी पुढाकार घेतल्यास पिंपरी चिंचवड शहर निश्चितच स्वच्छ सर्वेक्षणात अग्रस्थानी राहील. नागरिकांचा सक्रिय सहभाग आणि सातत्यपूर्ण जनजागृती यामुळेच स्वच्छतेची चळवळ अधिक प्रभावी ठरेल.”
– डॉ. विजय सूर्यवंशी, आयुक्त, पिंपरी चिंचवड महानगरपालिका