PCMC News – पिंपरी चिंचवड महापालिकेत भाजपाची एकहाती सत्ता आली आहे. सुरूवातीला भाजपने अपक्ष नगरसेवक बाजूला ठेवत ८४ नगरसेवकांची गटनोंदणी केली होती. मात्र, एका अपक्षाला सोबत घेतल्यानंतर स्थायीमध्ये ११ नगरसेवकांना संधी मिळेल हे लक्षात आल्यानंतर तातडीने अपक्षाला सोबत घेत एकत्र गटनोंदणी केली आहे. त्यामुळे भाजपाल स्थायी समितीमध्ये एक सदस्यपदाची जागा जास्त मिळणार आहे. अपक्ष सोबत असल्याने समितीमध्ये भाजपाच्या १० ऐवजी ११ नगरसेवकांना संधी मिळणार आहे. त्या गणितामुळे अजित पवारांच्या राष्ट्रवादी काँग्रेसचा एक सदस्य कमी होणार असून, केवळ ४ नगरसेवकांना संधी मिळणार आहे. स्थायी समितीमध्ये एकूण १६ सदस्य असतात. नगरसेवक संख्याबळानुसार स्थायी समितीमध्ये त्या-त्या पक्षांच्या नगरसेवकांना संधी मिळते. भाजपाचे एकूण ८४ नगरसेवक, राष्ट्रवादी काँग्रेसचे ३७, शिवसेनेचे (एकनाथ शिंदे) ६ आणि भाजपा संलग्न अपक्ष नगरसेवक १ आहे. नगरसेवक बलाबलानुसार स्थायी समितीमध्ये भाजपाच्या १० नगरसेवकांना संधी मिळते. राष्ट्रवादीच्या ४ आणि शिवसेनेच्या एका नगरसेवकाला समिती सदस्य होता येणार होते. मात्र, अपक्ष भाजपासोबत असल्याने भाजपाची संख्या ८५ होत आहे. नगरसेवक संख्याबळ वाढल्याने भाजपाच्या ११ नगरसेवकांना स्थायी समितीमध्ये प्रवेश मिळणार आहे. राष्ट्रवादीला ४ सदस्यांवर समाधान मानावे लागणार आहे. शिवसेनेचा केवळ एकच नगरसेवक समितीमध्ये असणार आहे. असे असले तरी, इतर विषय समितीमध्ये शिवसेनेला संधी मिळणार नाही. त्यात भाजपाचे ६ आणि राष्ट्रवादीचे ३ नगरसेवक हे सदस्य असतील.
