PCMC News – पिंपरी चिंचवड महापालिकेच्या वतीने शहरामध्ये पे अँड पार्किंग सुरू करण्यात आले होते. मात्र, नागरिकांचा प्रतिसाद न मिळाल्याने हा उपक्रम गुंडाळण्याची नामुष्की पालिका प्रशासनावर आली. असे असले तरी पालिकेच्या वतीने पुन्हा याची कडक अमंलबजावणी करण्यात येणार आहे. त्यासाठी स्थायी समिती अध्यक्ष आणि शहरी दळणवळण विभागाची नुकतीच एक बैठक पार पडली.

मात्र, यामुळे शहरात पुरेशा संख्येने वाहनतळ (पार्किंग झोन) विकसित करण्यात महापालिका अपयशी ठरल्याचे समोर आले आहे. पालिकेच्या शहर विकास आराखड्यात आरक्षित ८१ जागांपैकी केवळ १९ जागा ताब्यात आल्या असल्याचे धक्कादायक वास्तव आहे. पिंपरी चिंचवड शहराचा सातत्याने विस्तार होत आहे. सध्या शहराची लोकसंख्या ३० लाखांच्या पुढे आहे. तर तब्बल पाच लाखांहून अधिक वाहने रस्त्यावर धावत आहेत.

मोठ्या प्रमाणावर नागरीकरण झाल्याने खासगी वाहनांची संख्या दिवसेंदिवस वाढत आहे. त्यामुळे वाहनतळाची गरज निर्माण झाली आहे. मात्र, सद्यस्थितीत नागरिक रस्त्यांवर वाहने पार्क करत असल्याचे चित्र आहे. पालिकेने विकास आराखड्यात शहरातील वेगवेगळ्या ठिकाणचे ८१ ठिकाणी पार्किंग जागा निश्चित करण्यात आल्या होत्या. तसेच बीआरटीच्या ४ मार्गावर वाहनतळांसाठी जागा निश्चित केली होती.

मात्र, अद्याप या जागा पार्किंग झोन म्हणून विकसित करण्यात महापालिका प्रशासनाला यश आले नाही. जागा ताब्यात येण्यास कायदेशीर बाबी, व्यावसायिकांनी केलेले अतिक्रमण यामुळे जागा ताब्यात घेण्यास प्रशासनला अडचणी आल्या. महापालिका प्रशासनाच्या अनास्थेमुळे शहरातील आरक्षित ८१ जागांपैकी केवळ १९ जागा विकसित करण्यात आल्या आहेत.

एवढ्या मोठ्या प्रमाणावर वाहने असल्याने या जागा अपुऱ्या पडत आहेत. त्यामुळे नागरिक शहरातील रस्त्यांवर वाहने पार्क करत आहेत. त्यामुळे प्रशस्त रस्ते असूनही शहरामध्ये वाहतूककोंडीची समस्या निर्माण होते. यावर उपाय तसेच शहरातील वाहनचालकांना शिस्त लागावी यासाठी प्रशासनाने पे अँण्ड पार्किंग योजना सुरू केली होती.

दरम्यानच्या काळात त्याला प्रतिसाद न मिळाल्याने पे अँण्ड पार्क बंद करण्यात आले होते. मात्र, आता पुन्हा त्याची कडक अमंलबजावणी करण्यात येणार आहे. त्यामुळे एकीकडे शहरातील आरक्षित जागा विकसित करण्यास प्रशासनाला अपयश आले असताना, रस्त्यावर पे अँण्ड पार्क करून नागरिकांच्या खिशाला कात्री लावण्याचा डाव सत्ताधारी आणि महापालिका प्रशासन आखत आहे.