Patas Firing Case – दौंड तालुक्यातील पाटस येथे शुक्रवारी (दि. ५) दुपारी दोन गटात झालेल्या वादाचे रूपांतर थेट गोळीबारात झाले. श्रीगोंदा तालुक्यातील काही तरुण आणि पाटसच्या तरुणांमध्ये झालेल्या हाणामारीत गावठी पिस्तूलमधून चार राऊंड फायर करण्यात आले. सुदैवाने यात जीवितहानी झाली नसली तरी, या घटनेनंतर पाटस परिसरात तणावाचे वातावरण निर्माण झाले होते.

मिळालेल्या माहितीनुसार, पाटस सिमेंट कंपनीच्या माल वाहतूक ठेकेदारासोबत ट्रक मालकाचा सिमेंट वाहतूकीवरून वाद निर्माण झाला होता. दोन दिवसांपूर्वी ठेकेदार आणि वाहतूकदार यांच्यातील वाद मिटवण्यात आला होता. पण ठेकेदार आणि ट्रक मालक यांच्यात शाब्दिक बाचाबाची झाली असल्याने दोन्ही गटामध्ये तणावाचे वातावरण होते.

शुक्रवारी दुपारी दोनच्या सुमारास ट्रक मालक सुरज कुऱ्हाडकर हा पाटस येथील गजबजलेल्या गडदरे कॉम्प्लेक्स येथील ठेकेदाराच्या ऑफिसमध्ये आल्यानंतर ठेकेदार कडू आणि ट्रक चालक यांच्यामध्ये वाद झाला. यावेळी ठेकेदाराच्या पूर्व नियोजन उपस्थित असलेल्या श्रीगोंदा येथील सात ते आठ तरुणांनी ट्रक मालक सुरज कुऱ्हाडकर व चालक श्रीकांत पवार यांना मारहाण करण्यास सुरुवात केली.

यामध्ये एकाने गावठी पिस्तुल काढून तीन गोळ्या हवेत फायरिंग केल्या, तर एक गोळी चारचाकी वाहनाच्या (एम.एच. ४२ बी.बी. ६६५७) पाठीमागील बाजूस लागली. यानंतर एका गटातील तरुण वाहनातून जात असल्याने दुसऱ्या गटातील तरुणांनी त्याच्या चारचाकी वाहनावर दगडफेक करून वाहनाचे नुकसान केले.

घटनेनंतर पाटस परिसरात पोलीस बंदोबस्त वाढवण्यात आला, वातावरण शांत ठेवण्यासाठी प्रयत्न सुरू आहेत. दोषींवर कठोर कारवाई होणार असल्याचे पोलिसांनी सांगितले आहे. तसेच, नागरिकांनी अफवांवर विश्वास ठेवू नये, शांतता राखावी असे आवाहन पोलिसांनी केले आहे.

आठ आरोपींना अटक
दोन्ही गटातील दहा ते बारा आरोपी घटनेत सहभागी असून आठ आरोपींना पाटस परिसरातून अटक करण्यात आली आहे. दोन्ही गटावर परस्पर विरोधी गुन्हे दाखल करण्यात येणार आहेत, असे बारामतीचे अप्पर पोलीस अधीक्षक गणेश बिराजदार यांनी सांगितले. घटनेची माहिती मिळताच दौंडचे उपविभागीय पोलीस अधिकारी बापू दडस, यवतचे पोलीस निरीक्षक नारायण देशमुख आणि पाटस पोलीस घटनास्थळी दाखल झाले. पोलिसांनी परिस्थिती नियंत्रणात आणली. यवत पोलीस प्रकरणाचा अधिक तपास करीत आहेत.