Paris Paralympics 2024 : – पॅरालिम्पिक खेळांचा उद्घाटन सोहळा पॅरिसमधील सीन नदीच्या काठावर आज (28 ऑगस्ट ) होणार आहे. स्पोर्ट्स18 नेटवर्कवर भारतीय चाहते हा सोहळा थेट पाहू शकतात. तसेच जिओ सिनेमा ॲप आणि वेबसाइटवर लाईव्ह स्ट्रीम केले जाईल. पॅरिसमध्ये उद्घाटन सोहळा 8 वाजता सुरू होणार असला तरी भारतीय वेळेनुसार तो रात्री 11.30 वाजता सुरू होईल.

फ्रान्सची राजधानी पॅरिसमध्ये पुन्हा एकदा खेळाडूंचा मेळावा होणार आहे. पॅरालिम्पिक गेम्ससाठी जगभरातून पॅरा ॲथलीट येथे पोहचले आहेत. पॅरिस पॅरालिम्पिक स्पर्धा आजपासून (28 ऑगस्ट) ते 8 ऑगस्ट दरम्यान होणार आहेत. या स्पर्धेतील 22 खेळांमध्ये 4400 खेळाडू सहभागी होणार आहेत. या स्पर्धेत एकूण 549 पदके असतील, त्यापैकी 236 पदके महिलांसाठी असतील.

भारतीय संघ स्पर्धेसाठी सज्ज… 

दरम्यान, अनुभवी आणि नवोदित खेळाडूंचे मिश्रण असलेला भारतीय संघ पॅरिस येथे होणाऱ्या पॅरालिम्पिक स्पर्धेसाठी सज्ज झाला आहे. पॅरिस पॅरालिम्पिक स्पर्धेत सहभागी होण्यासाठी भारताने ८४ खेळाडूंचे पथक पॅरिसमध्ये दाखल झाले असून उद्घाटन सोहळ्यासाठी भारताचे सुमित अंतील व भाग्यश्री जाधव हे ध्वजवाहक असणार आहेत. टोकियो पॅरालिम्पिकमध्ये १९ पदके जिंकून भारताने २४ वे स्थान राखले होते. आजपासून सुरु होणाऱ्या स्पर्धेत किमान २५ पदकांची अपेक्षा असल्याचे पॅरालिम्पिक समितीचे अध्यक्ष देवेंद्र झंझारीया यांनी सांगितले होते.

सन २०२० मध्ये झालेल्या टोकियो पॅरालिम्पिक हे भारतासाठी सर्वाधिक यशस्वी ठरले होते. यामध्ये भारतीय खेळाडूंनी तब्बल १९ पदकांची कमाई करताना पदकतक्त्यात २४ वे स्थान राखले होते. यामध्ये ५ सुवर्ण, ८ रौप्य तर ६ कांस्य अशी कामगिरी भारतीय संघाने नोंदविली होती. यापूर्वी झालेल्या पॅरालिम्पिक स्पर्धांमध्ये भारतीय संघाने केवळ १२ पदके जिंकली होती. १९७२ साली मुरलीकांत पेटकर यांनी जलतरणातील ५० मीटर फ्री स्टाईल प्रकारात ३७.३३ सेकांदाची वेळ नोंदविताना भारताला पहिले पदक मिळवून दिले होते.

या स्पर्धेत ३२ महिला खेळाडूंसह ८४ खेळाडू भारताचे प्रतिनिधित्व करणार आहेत. यापैकी सुमारे ५० खेळाडू हे पदक जिंकण्यासाठी सक्षम आहेत. यातून प्रमोद भगतचा उत्तेजकद्रव्य नियमांचे उल्लंघन केल्याने भारतीय संघात समावेश करण्यात आला नाही.

महाराष्ट्राचे खेळाडू

सचिन खिलारी, भाग्यश्री जाधव (गोळाफेक), संदीप सरगर (भालाफेक), दिलीप गावित (४०० मीटर धावणे), सुकांत कदम (बॅडमिंटन, पुरुष एकेरी), ज्योती गडेरीया (पॅरा सायकलिंग), स्वरूप उन्हाळकर (नेमबाजी, १० मीटर एयर रायफल), सुयश जाधव (जलतरण, ५० मीटर बटरफ्लाय) हे खेळाडू महाराष्ट्राचे खेळाडू स्पर्धेमध्ये चमकदार कामगिरी करण्यासाठी उत्सुक असणार आहेत. भाग्यश्री जाधवने टोकियो स्पर्धेत एफ-३४ गटातून रौप्य पदकाची कामगिरी केली होती. याचबरोबरीने सचिन खिलारीने देखील सलग दोन वर्ल्ड पॅरा ऍथलेटिक्स स्पर्धेत सुवर्णकामगिरी बजावल्यामुळे या दोन्ही खेळाडूंकडून पदकांची अपेक्षा आहे.

ISL 2024 : आयएसएलचा थरार 13 सप्टेंबरपासून…! जाणून घ्या, ओपनिंग मॅच अन् स्ट्रीमिंगसह सर्व डिटेस्ल एका क्लिकवर….

उद्घाटन सोहळा

३३ व्या पॅरिस ऑलिम्पिकच्या धरतीवरच पॅरालिम्पिकच्या उदघाटन सोहळयाचे देखील दिमाखदार आयोजन करण्यात आले आहे. चॅम्प्स-एलिसीजवरील लोकप्रिय परेडने या समारंभाची सुरुवात होणार आहे. ज्यामध्ये १८४ प्रतिनिधींचा समावेश असणार आहे.

पदकांची अपेक्षा असणारे खेळाडू

१ – अवनी लेखरा – १० मीटर एयर रायफल
२ – सुमित अंतील – भालाफेक
३- मनीष नरवाल – ५० मीटर पिस्तूल
४- कृष्णा नागर – बॅडमिंटन