Paragliding World Cup – येथे १४ ते २१ फेब्रुवारी या कालावधीत पार पडलेल्या पॅराग्लायडिंग विश्वचषक स्पर्धेने आकाशात रोमांचक थरार निर्माण केला. सात दिवस चाललेल्या या आंतरराष्ट्रीय स्पर्धेत एकूण सात टप्पे यशस्वीरीत्या पूर्ण करण्यात आले. विविध देशांतील अव्वल वैमानिकांनी सहभाग नोंदवत कौशल्य, वेग आणि अचूक दिशानियोजन यांची उत्कृष्ट सांगड घातली. पुरुष गटात फ्रान्सच्या मॅक्सिम पिनो यांनी सातत्यपूर्ण आणि अचूक कामगिरीच्या जोरावर प्रथम क्रमांक पटकावला. ग्रेट ब्रिटनच्या हुआन ओस्पिना यांनी दुसरे स्थान मिळवले. तर बेल्जियमच्या थिबॉल्ट व्होग्ले यांनी तिसरा क्रमांक मिळवत पदकांची शर्यत रंगतदार केली. सर्व सात टप्प्यांतील एकत्रित गुणांच्या आधारे अंतिम निकाल जाहीर करण्यात आला. महिला गटात देखील फ्रान्सचा दबदबा कायम राहिला. फ्रान्सच्या कॉन्स्टन्स मेटेटाल यांनी प्रथम क्रमांक पटकावत सुवर्णपदक जिंकले. जपानच्या केईको हिराकी यांनी दुसरे स्थान मिळवले. तर अमेरिकेच्या अॅलेक्सिया फिशर यांनी तिसरा क्रमांक मिळवला. महिला गटातील स्पर्धा विशेषतः तांत्रिक कौशल्य आणि हवामानाच्या बदलत्या परिस्थितीशी जुळवून घेण्याच्या क्षमतेसाठी उल्लेखनीय ठरली. संघ गटात आंतरराष्ट्रीय संघांनी वर्चस्व गाजवले. क्रॉसकंट्री मॅगझिन संघाने प्रथम स्थान मिळवले. ओझोन संघाने द्वितीय, तर निवियुक १ संघाने तृतीय क्रमांक मिळवत संघात्मक समन्वय आणि रणनीतीचे दर्शन घडवले. स्पर्धेदरम्यान पाचगणीमध्ये देश- विदेशातून मोठ्या संख्येने पर्यटक आणि क्रीडारसिक दाखल झाले. स्थानिक हॉटेल व्यवसाय, वाहतूक व्यवस्था आणि खाद्यव्यवसायाला मोठी चालना मिळाली. सुरक्षित आणि नियोजनबद्ध आयोजनाबद्दल आयोजकांचे कौतुक करण्यात आले. पाचगणीची ओळख साहसी क्रीडा केंद्र म्हणून अधिक दृढ झाली असून, या विश्वचषक स्पर्धेमुळे भारतातील पॅराग्लायडिंग क्रीडेला नवे बळ मिळाल्याची भावना व्यक्त होत आहे.
