– प्रा. शेखर मोहिते

Kas Pathar : सातारा जिल्ह्यातील प्रसिद्ध कास पठारावर (Kas Pathar) यंदा फुलांचा हंगाम काहीसा उशिराने सुरू झाला आहे. कास पठारावरील वनस्पतींची वाढ आणि फुलांचा बहर हा वेळेवर होणाऱ्या मान्सूनच्या पावसावर मोठ्या प्रमाणात अवलंबून असतो. यावर्षी जून महिन्यात मान्सूनचा अपेक्षित पाऊस न झाल्याने पठारावरील वनस्पतींच्या वाढीस काहीसा वेळ लागला.

गुलाबी-जांभळ्या फुलांनी पठार बहरले

सध्या कास पठारावर (Kas Pathar) विविध रंगांची फुले पर्यटकांचे लक्ष वेधून घेत आहेत. जांभळा तेरडा, गुलाबी तेरडा, चवर, तारागुच्छ, सोनकी, कुमुदिनी, मंजिरी, धनगराचा फेटा, हायबेनरिया यांसारखी जमिनीवर वाढणारी ऑर्किडची फुले, अबोलीमा, नीलिमा आणि आभाळी अशा विविध वनस्पतींची फुले पाहायला मिळत आहेत.

दर पंधरवड्याला बदलते फुलांची रंगसंगती

कास पठाराचे (Kas Pathar) वैशिष्ट्य म्हणजे येथे विविध वनस्पतींची फुले एकाच वेळी नव्हे, तर वेगवेगळ्या कालावधीत बहरतात. साधारणपणे दर पंधरवड्याला पठाराची रंगसंगती बदलताना दिसते. सध्या गुलाबी रंगाचा तेरडा आणि जांभळ्या रंगाची मंजिरी मोठ्या प्रमाणात पाहायला मिळत आहे.

गाईडमार्फत घ्या फुलांची माहिती

कास पठारावरील फुलांचे सौंदर्य पाहण्यासाठी कास कार्यकारी समिती आणि वनविभागाच्या माध्यमातून व्ह्यू पॉईंट तसेच विविध दृश्यस्थळे तयार करण्यात आली आहेत. पर्यटकांनी फुलांची माहिती जाणून घेण्यासाठी अधिकृत गाईडची मदत घ्यावी. गाईडना फुलांची आणि वनस्पतींची माहिती देण्यासाठी योग्य प्रशिक्षण देण्यात आले आहे.

पर्यटकांसाठी विद्युत गाड्यांची व्यवस्था

पठारावर (Kas Pathar) फुलांचा आनंद घेताना पर्यटकांना सुविधा मिळावी यासाठी कास पठार कार्यकारी समितीने विद्युत गाड्यांची व्यवस्था केली आहे. त्यामुळे पर्यटकांना पठारावरील विविध दृश्यस्थळांपर्यंत पोहोचणे सोपे होत आहे.

१५ ऑक्टोबरपर्यंत फुलांचा बहर; त्यानंतर नव्या वनस्पतींची चाहूल

पुढील काळात पाऊस चांगला पडत राहिल्यास कास पठारावर अशाच विविधरंगी फुलांचा बहर १५ ऑक्टोबरपर्यंत पाहायला मिळण्याची शक्यता आहे. त्यानंतर पिवळा स्मितिया कावळा, पिवळा तेरडा, फ्लेमिंग्जिया, ड्रोसेरा या कीटकभक्षी वनस्पतींसह गवतांच्या विविध प्रजाती पठारावर बहरताना दिसतील.

कास पठारावरील (Kas Pathar) फुलांची ही बदलती रंगसंगती आणि जैवविविधता पाहण्यासाठी पर्यटकांनी निसर्गाचे संवर्धन करत फुलांना हात न लावता त्यांचा आनंद घ्यावा, असे आवाहन करण्यात आले आहे.