मुंबई : भाजप नेत्या पंकजा मुंडे सध्या शिवशक्ती परिक्रमा दौऱ्यासाठी राज्यभर फिरत आहेत. या दौऱ्यावेळी त्यांनी नाशिक जिल्ह्यातील नांदूरशिंगोटे गावात भेट दिली. यावेळी त्यांनी येथील एकलव्य आदिवासी वस्तीत अस्सल गावरान जेवणाचा आस्वाद घेतला. विशेष म्हणजे, पंकजा मुंडे यांनी चुलीजवळ बसून स्वतः बाजरीच्या भाकरी देखील तव्यावर भाजल्या. यानंतर वस्तीतील ग्रामस्थांसोबत मनमोकळा संवाद साधला. श्रावण महिन्याचे औचित्य साधून भाजप नेत्या पंकजा मुंडे यांनी राज्यभरातील धार्मिक स्थळांना भेटी देण्यास सुरुवात केली आहे. दोन दिवसांपासून हा दौरा सुरु असून पहिला दिवस छत्रपती संभाजीनगर येथून सुरू होऊन नाशिक जिल्ह्यात आला. यात येवला, निफाड, पिंपळगाव, सप्तशृंगी गड, त्यानंतर नाशिकला मुक्काम होता. दुसऱ्या दिवशी सकाळी त्र्यंबकेश्वरला जाऊन पंकजा मुंडे यांनी दर्शन घेतले. त्यानंतर पुन्हा परतीचा प्रवास सुरू झाला. यावेळी त्यांनी सिन्नर तालुक्यातील नांदूरशिंगोटे येथे भेट दिली. येथील गोपीनाथ गडावर जाऊन अभिवादन केले. त्यानंतर पंकजा मुंडे यांनी आदिवासी वस्तीत जाऊन कुटुंबासोबत चुलीवरील जेवणाचा आस्वाद घेतला. शिवशक्ती परिक्रमा यात्रेनिमित्ताने सिन्नर तालुक्यातील नांदूरशिंगोटे येथे आलेल्या पंकजा मुंडे यांनी एकलव्यनगर ठाकर आदिवासी पाड्यास भेट दिली. येथे स्वागत झाल्यानंतर त्यांनी एका घरात जाऊन भाकरी थापत चुलीवरील भोजनाचाही आस्वाद घेतला. देवराम आगिवले या आदिवासी कुटुंबाकडे जेवणासाठी गेल्या होत्या. यावेळी मुंडे यांनी चुलीजवळ बसून बाजरीच्या भाकरी थापल्या. मुंडे यांच्यासाठी स्वयंपाक बनवणाऱ्या मथुराबाई आगिवले, जयश्री आगिवले, सुलाबाई पथवे, गीता आगिवले यांनी ठाकर समाजातील शेंगदाण्याची चपाती मुंडे यांना बनवून दाखवली. यावेळी घरातील महिलांशी गुजगोष्टी केल्या. त्यांनी थेट चुलीसमोरच बैठक मारत हाताने पीठ मळून त्यांनी काही वेळेतच भाकरी थापली. चुलीवर तापलेल्या तव्यावर त्यांनी भाकरी टाकत पाण्याचा शिपकाही मारला. त्यांनंतर भाकरी पिठले, कुळथाचे शेंगोळे, मटकी, ठेचा, झिरके, शेंगदाण्याची पोळी अशा भोजनाचा आस्वाद घेतला.
