इस्लामाबाद : ग्रीसजवळ बोट बुडून 27 पाकिस्तानी निर्वासितांचा मृत्यू झाल्यानंतर देशात निर्माण झालेल्या वादामुळे शेहबाज शरीफ यांचे सरकार हादरले आहे. माजी पंतप्रधान इम्रान खान यांनाही सरकार आणि आस्थापनेला (सेना + गुप्तचर नेतृत्व) कोंडीत पकडण्याची संधी मिळाली आहे. या मुद्द्यांवरून होणारी टीका कमी करण्याच्या प्रयत्नात शरीफ सरकारने सोमवारी देशव्यापी शोक दिन पाळण्याचा निर्णय घेतला. तसेच पाकिस्तानी लोकांना बेकायदेशीरपणे देशाबाहेर नेण्याच्या घटनांची चौकशी करण्याची घोषणा केली.

बेकायदेशीरपणे युरोपात प्रवेश करण्यासाठी जाणारी बोट बुडाल्याने एकूण 79 जणांचा मृत्यू झाला. या बोटीवर मोठ्या संख्येने पाकिस्तानी असल्याची माहिती नंतर मिळाली. मृतांमध्ये 27 पाकिस्तानी नागरिकांची ओळख पटली आहे. या अपघातातून बचावलेल्यांमध्ये 12 पाकिस्तानी आहेत. वृत्तानुसार, त्या लोकांव्यतिरिक्‍त, जहाजावर आणखी 50 पाकिस्तानी होते, जे अद्याप बेपत्ता आहेत.

ही बातमी आल्यापासून पाकिस्तानात हाहाकार माजला आहे. लोक याला बेलगाम मानवी तस्करीचा परिणाम मानत आहेत आणि ते रोखण्यात अपयशी ठरल्याबद्दल सरकारवर टीका होत आहे. पाकिस्तानमध्ये सुरुवातीपासून कायद्याचे राज्य प्रस्थापित करण्याऐवजी काही लोक आणि विशिष्ट वर्गाचे राज्य आहे, असे इम्रान खान यांनी म्हटले आहे. त्याचाच परिणाम आहे की आज देश अशी गरिबी आणि दु:खात आहे आणि त्यामुळे लोक देश सोडून पळून जात आहेत.

पंतप्रधान शहबाज शरीफ यांनी आता अधिकाऱ्यांना मानवी तस्करांची ओळख पटवण्याचे आदेश दिले आहेत. पाकिस्तानात हा धंदा मोठ्या प्रमाणात सुरू असून, त्यात लोकांना सुखी जीवनाचे लालूच दाखवून बेकायदेशीरपणे परदेशात नेले जात आहे. पाकव्याप्त काश्‍मीरमध्ये सुमारे डझनभर लोकांना ताब्यात घेण्यात आले आहे. अपघातात बळी गेलेले अनेक जण याच भागातील आहेत.

पाकिस्तानच्या फेडरल इन्व्हेस्टिगेशन एजन्सीने ग्रीसजवळ समुद्र दुर्घटनेत बळी पडलेल्यांची ओळख पटवण्यासाठी परदेशात गेलेल्यांना परत आणण्यासाठी डीआयजी रॅंकच्या नेतृत्वाखाली टीम तयार केली आहे.