Imran khan – तुरुंगात असलेले पाकिस्तानचे माजी पंतप्रधान इम्रान खान यांना वैद्यकीय तपासणीसाठी खासगी रुग्णालयात हलवण्याचे आदेश सर्वोच्च न्यायालयाने दिले आहेत. इम्रान खान यांना आगामी काही दिवसात इस्लामाबादेतल्या शिफा इंटरनॅशनल हॉस्पिटलमध्ये दाखल करण्यात यावे आणि १६ सप्टेंबरला होणाऱ्या पुढील सुनावणीपर्यंत तेथेच ठेवण्यात यावे. याशिवाय इम्रान खान यांच्या प्रकृतीबाबतचा अहवाल देण्यासाठी आणि त्यांच्यावर उपचार करण्यासाठी एका मेडिकल बोर्डाची स्थापना करण्यात यावी, असे निर्देश सर्वोच्च न्यायालयाने दिले आहेत.

इम्रान खान २०२३ पासून तुरुंगात असून त्यांचे कुटुंबीय, पक्षाचे पदाधिकारी, वकील आणि फॅमिली डॉक्टरांनाही त्यांच्या भेटीची परवानगी नाकारली जात असल्याचा आरोप त्यांच्या समर्थकांकडून केला जातो आहे. अलिकडेच एका पत्रकाराने तुरुंगातील अधिकाऱ्यांच्या हवाल्याने इम्रान खान जिवंत असल्याबद्दल शंका उपस्थित केली होती. तेंव्हापासून इम्रान समर्थक आक्रमक झाले आणि इम्रान यांच्या सुटकेसाठी उग्र आंदोलनाचा इशाराही दिला गेला.

कायदा आणि सुव्यवस्थेसाठी इम्रान खान यांच्यावर खासगी रुग्णालयात उपचार केले जावेत असे सर्वोच्च न्यायालयाने म्हटले आहे. मात्र त्याच वेळी रुग्णालयाबाहेर बंदोबस्त ठेवण्यात यावा. वैद्यकीय अहवालांचा राजकारणासाठी वापर केला जाऊ नये. तसे झाल्यास इम्रान खान यांना दिल्या जाणाऱ्या सुविधा रद्द केल्या जातील, असेही न्यायालयाने म्हटले आहे.

इम्रान यांचे डोळे आता सुस्थितीत

इम्रान खान यांच्या डोळ्यांना झालेल्या विकाराची माहिती या वर्षी उघड झाली. त्यानंतर काही याचिकाकर्त्यांनी इम्रान यांच्यावर खासगी रुग्णालयात उपचारांची मागणी न्यायालयात केली होती. आता इम्रान खान यांच्या डोळ्यांची स्थिती चांगली असून पूर्वीची दृष्टी पुन्हा आली असल्याचे तुरुंगाच्या अधिकाऱ्यांनी न्यायालयाला कळवले आहे. इम्रान खान यांना नोव्हेंबर २०२३ पासून वेगवेगळ्या रुग्णालयात ३९ वेळा वैद्यकीय तपासणीसाठी नेण्यात आल्याचेही तुरुंगाच्या अधिकाऱ्यांनी सांगितले.