Pakistan News – तुरुंगात असलेले पाकिस्तानचे माजी पंतप्रधान इम्रान खान यांच्यावर गेल्या वर्षी ९ मे रोजी झालेल्या दंगल प्रकरणी लष्करी न्यायालयात खटला चालवला जाऊ शकेल, एवढे पुरावे उपलब्ध आहेत, असे पाकिस्तानचे संरक्षण मंत्री ख्वाजा आसिफ यांनी म्हटले आहे. लष्करी न्यायालयातील खटले यापूर्वी देखील झालेले आहेत. भविष्यात देखील असे खटले चालवले जातील, असे शनिवारी एका वृत्तवाहिनीशी बोलताना आसिफ म्हणाले. गेल्या वर्षी ९ मे रोजी झालेल्या दंगलीमधील सहभागाच्या मुद्यावरून इम्रान खान यांच्यावर लष्करी न्यायालयात खटला चालवला जाण्याची शक्यता आहे. लष्करी न्यायालयातील हा खटला थांबवण्यात यावा या मागणीसाठी इम्रान खान यांनी इस्लामाबाद उच्च न्यायालयात एक याचिका दाखल केली आहे. मात्र न्यायालयाच्या रजिस्ट्रारनी खान यांच्या याचिकेवर आक्षेप नोंदवला आहे. इम्रान खान यांनी आपल्या याचिकेत कोणत्याही एफआयआरचा उल्लेख केलेला नाही. तसेच त्यांनी कोणतीही कागदपत्रे किंवा आदेश देखील जोडलेले नाहीत. लष्करी न्यायालयातील प्रकरण सर्वोच्च न्यायालयात प्रलंबित असताना त्या संदर्भात उच्च न्यायालयात याचिका कशी दाखल केली जाऊ शकेल, रजिस्ट्रारनी म्हटले आहे. इम्रान खान यांच्याविरोधात लष्करी न्यायालयात खटला चालवला जाऊ शकतो, अशी शक्यता सत्तारुढ पएमएल-एन पक्षाने यापूर्वी देखील वर्तवली होती. इम्रान खान यांच्या पंतप्रधानपदाच्या कार्यकाळादरम्यान देखील २४ नागरिकांवर लष्करी न्यायालयात खटले चालवले गेले होते, याची आठवण आसिफ यांनी करून दिली. सामान्य नागरिकांवर लष्करी न्यायालयात खटला चालवला जाऊ शकत नाही, असे सर्वोच्च न्यायालयाने गेल्या वर्षी ऑक्टोबरमधील सुनावणीमध्ये म्हटले होते. मात्र राष्ट्रीय, प्रांतीय सरकारांनी आणि संरक्षण मंत्रालयाने या निर्णयाला आव्हान दिल्यावर हा निर्णय डिसेंबरमध्ये रद्द ठरवण्यात आला होता. इम्रान खान यांना गेल्या वर्षी भ्रष्टाचार प्रकरणी इस्लामाबाद उच्च न्यायालयाच्या आवारातून अटक झाल्यावर पीटीआयच्या कार्यकर्त्यांनी डझनभर लष्करी ठिकाणांवर हल्ले केले होते. या प्रकरणी लष्करी न्यायालयात खटला चालवला जाण्याची शक्यता पीटीआयने फेटाळली आहे.
