नवी दिल्ली : करोनाचा फैलाव संपूर्ण जगभरात झाला त्यात पाकिस्तान देखील सुटू शकले नाही. करोनासोबत लढण्यासाठी इम्रान खान सरकारने आता भारताकडे मदतीची याचना केली आहे.  सुत्रांनी दिलेल्या माहितीनुसार, पाकिस्तानने भारताकडे हायड्रॉक्सीक्लोरोक्विनचा पुरवठा  करण्याची मागणी केली आहे.

अमेरिका आणि ब्राझीलने यापूर्वीच भारताकडे हायड्रॉक्सीक्लोरोक्विनचा पुरवठा करण्याची मागणी केली होती. हायड्रॉक्सीक्लोरोक्विन हे औषध करोना व्हायरसवर प्रभावी ठरु शकते असा अंदाज असल्याने सर्वच देशांमध्ये सध्या या औषधाला प्रचंड मागणी आहे.

भारताकडे हायड्रॉक्सीक्लोरोक्विनसाठी मदत मागणाऱ्या देशांमध्ये आता पाकिस्तानचाही समावेश झाला आहे. पाकिस्तानमध्ये करोनाचे सहा हजार रुग्ण सापडले असून १०० जणांचा मृत्यू झाला आहे. याआधी इम्रान खान यांनी पाकिस्तानला मदतीचे आवाहन करणार एक व्हिडीओ शेअर केला होता. त्यामध्ये ते म्हणाले होते की, “आंतरराष्ट्रीय समुदाय, संयुक्त राष्ट्र सुरक्षा परिषद आणि आंतरराष्ट्रीय वित्तीय संस्था यांना माझं आवाहन आहे की, या संकटाच्या काळात पाकिस्तानसारख्या कर्जबाजारी देशांसाठी काही तरी ठोस मोहीम राबवावी. या मोहिमेअंतर्गत विकसनशील देशांचे कर्ज माफ करण्यात यावं”.