Pakistan vs England Test Series : पाकिस्तान क्रिकेट संघाला 7 ऑक्टोबरपासून इंग्लंडविरुद्ध घरच्या मैदानावर तीन सामन्यांची कसोटी मालिका खेळायची आहे, ज्याचे वेळापत्रक आणि ठिकाण पीसीबीने आधीच जाहीर केले होते, ज्यामध्ये दोन्ही संघांमधील कसोटी सामने मुलतान, कराची आणि रावळपिंडी या तीन ठिकाणी खेळले जाणार होते. आता पीसीबीने वेळापत्रकात थोडा बदल केला आहे ज्यामध्ये आता तीनही कसोटी सामने हे मुलतान आणि रावळपिंडीच्या मैदानावर खेळवले जातील.

पीसीबी अध्यक्षांनी दिला दुजोरा…

पाकिस्तान क्रिकेट बोर्डाला 2025 च्या सुरुवातीला आयसीसी चॅम्पियन्स ट्रॉफीचे आयोजन करायचे आहे, ज्यासाठी लाहोरमधील गद्दाफी स्टेडियममध्ये नूतनीकरणाचे काम सुरू आहे, याशिवाय कराचीमधील स्टेडियमचीही अशीच परिस्थिती आहे. ईएसपीएन क्रिकइन्फोमध्ये प्रकाशित झालेल्या पीसीबीचे अध्यक्ष मोहसिन नक्वी यांच्या विधानानुसार, त्यांनी पुष्टी केली आहे की, “इंग्लंडविरुद्धचे तीनही कसोटी सामने पाकिस्तानमध्ये खेळवले जातील, ज्यामध्ये या कसोटी मालिकेचे सामने मुलतान आणि रावळपिंडी येथे खेळले जातील.”

पीसीबी अध्यक्षांच्या प्रवक्त्याने याबाबत माहिती दिली आहे की, इंग्लंड आणि वेल्स क्रिकेट बोर्डाला स्थळ बदलाबाबत आधीच माहिती देण्यात आली आहे आणि ते त्याबद्दल समाधानी आहेत.

PAK vs ENG : चॅम्पियन्स ट्रॉफीपूर्वी पाकिस्तानवर मोठी नामुष्की..? इंग्लंड कसोटी मालिकेबाबत समोर आली मोठी अपडेट…

इंग्लंडचा संघ 2 ऑक्टोबरला पोहोचणार पाकिस्तानात…

इंग्लंड संघाचे मुख्य प्रशिक्षक ब्रेंडन मॅक्युलम यांनीही या कसोटी मालिकेचे ठिकाण निश्चित न झाल्याबद्दल चिंता व्यक्त केली होती, ज्यात त्यांनी म्हटले होते की, त्यांच्या संघाला अगोदरच ठिकाणाची माहिती असणे आवश्यक आहे जेणेकरून ते तेथील परिस्थितीनुसार संघाची निवड करू शकतील . इंग्लंडचा संघ 2 ऑक्टोबरला पाकिस्तानला पोहोचणार असून, या मालिकेतील पहिला कसोटी सामना 7 ऑक्टोबरपासून दोन्ही संघांमध्ये खेळवला जाणार आहे. आता प्रत्येकजण पीसीबीकडून सुधारित वेळापत्रकाच्या घोषणेची वाट पाहत आहे.