Pakistan Cricket Team Wears Pink Jersey Against England for Breast Cancer Awareness : आंतरराष्ट्रीय क्रिकेटमध्ये प्रत्येक संघाची स्वतःची एक वेगळी ओळख आणि जर्सीचा ठरलेला रंग असतो. अनेक दशकांपासून ‘हिरव्या रंगाची जर्सी’ ही पाकिस्तान संघाची प्रमुख ओळख राहिली आहे. मात्र, रविवारी २५ ऑक्टोबर रोजी इंग्लंडविरुद्धच्या एकदिवसीय सामन्यात पाकिस्तानी खेळाडूंना पाहून क्रिकेट चाहत्यांना मोठा सुखद धक्का बसला. या सामन्यात पाकिस्तानचे सर्व खेळाडू हिरव्या ऐवजी गुलाबी रंगाच्या (Pink) जर्सीत मैदानात उतरले. पदार्पण करणाऱ्या रेझाउल्लाह यालाही पारंपरिक हिरव्या टोपीऐवजी गुलाबी रंगाची कॅप देण्यात आली. अचानक झालेल्या या बदलामागे एक अत्यंत सामाजिक आणि कौतुकास्पद उद्देश दडलेला आहे.

स्तन कर्करोग जनजागृतीसाठी पीसीबीचा पुढाकार –

पाकिस्तान क्रिकेट बोर्डाने (PCB) स्तन कर्करोगाबाबत (Breast Cancer) जनजागृती निर्माण करण्यासाठी आणि लवकर तपासणीच्या महत्त्वाचा संदेश देण्यासाठी हा विशेष निर्णय घेतला. जगभरात ऑक्टोबर महिना हा ‘स्तन कर्करोग जनजागृती महिना’ (Breast Cancer Awareness Month) म्हणून पाळला जातो. या पार्श्वभूमीवर पीसीबीने ‘पिंक रिबन ब्रेस्ट कॅन्सर ट्रस्ट हॉस्पिटल’सोबत भागीदारी करून ही मोहीम हाती घेतली. या उदात्त कार्याला पाठिंबा दर्शवण्यासाठी इंग्लंडचे खेळाडू, सामन्याचे पंच आणि समालोचकही आपल्या जर्सीवर गुलाबी फिती (Pink Ribbon) लावून मैदानात उपस्थित राहिले.

गद्दाफी स्टेडियमवर गुलाबी वातावरण आणि मोफत तपासणी –

Pakistan go pink for breast cancer awareness 💗

#PAKvENG #PinkDay https://t.co/wkzknHPB9X

— Cricinfo (@cricinfo) October 25, 2026

या ऐतिहासिक सामन्यासाठी मैदानावरील यष्ट्याही (Stumps) गुलाबी रंगाने सजवण्यात आल्या होत्या. याशिवाय स्टेडियममधील डिजिटल स्क्रीन्स आणि सीमारेषेवरील जाहिरात फलकांवर स्तन कर्करोगाच्या प्रतिबंधात्मक उपायांचे संदेश झळकवण्यात आले. या मोहिमेचा भाग म्हणून पीसीबी आणि ट्रस्टने मिळून २४ ते २६ ऑक्टोबर दरम्यान क्रिकेट चाहत्यांसाठी स्टेडियम परिसरात मोफत स्तन कर्करोग तपासणी शिबिराचेही आयोजन केले आहे.

हेही वाचा – Asia Cup Schedule : मैदानावर पुन्हा पेटणार भारत-पाक युद्ध! आशिया कपचे वेळापत्रक जाहीर; ‘या’ दिवशी होणार हायव्होल्टेज मुकाबला

दक्षिण आफ्रिकेच्या पावलावर पाऊल ठेवत पाकिस्तानची कृती –

First-over Shaheen strikes! 🦅

Pakistan’s captain claims his 150th ODI wicket 👏 #PAKvENG https://t.co/wxlxq3GGCF

— Cricinfo (@cricinfo) October 25, 2026

आंतरराष्ट्रीय क्रिकेटमध्ये असा सामाजिक उपक्रम राबवणारा पाकिस्तान हा पहिला देश नाही. यापूर्वी दक्षिण आफ्रिका क्रिकेट बोर्डाने ही परंपरा सुरू केली असून, तिथे दरवर्षी ‘पिंक डे’ साजरा केला जातो. त्या दिवशी दक्षिण आफ्रिकेचा संघ आपल्या पारंपरिक हिरव्या रंगाऐवजी गुलाबी जर्सी घालून सामना खेळतो आणि कर्करोग रुग्णांसाठी निधी उभारतो. आता पाकिस्ताननेही अशाच प्रकारची मोहीम राबवून क्रीडा विश्वात एक सकारात्मक सामाजिक संदेश दिला आहे.