US-Iran war – अमेरिका आणि इराणमधील संभाव्य महायुद्ध टाळण्यासाठी पाकिस्तानने आपल्या राजनैतिक मध्यस्थीचे प्रयत्न कमालीचे तीव्र केले आहेत. पाकिस्तानचे गृहमंत्री मोहसिन नक्वी यांनी गुरुवारी तेहरानमध्ये इराणचे परराष्ट्र मंत्री अब्बास अराघची यांची भेट घेऊन शांतता चर्चेशी संबंधित महत्त्वपूर्ण मुद्द्यांवर चर्चा केली. एका आठवड्यापेक्षा कमी कालावधीतील नक्वी यांचा हा दुसरा इराण दौरा आहे. या पार्श्वभूमीवर, पाकिस्तानचे लष्करप्रमुख फील्ड मार्शल आसिम मुनीर हे देखील तेहरान दौऱ्यावर जाण्याची शक्यता इराणच्या सरकारी प्रसारमाध्यमांनी वर्तवली आहे. इराणचे राष्ट्राध्यक्ष मसूद पेझेशकियान आणि गृहमंत्री नक्वी यांच्यात अलीकडील प्रादेशिक घडामोडी आणि अमेरिका-इराण अप्रत्यक्ष वाटाघाटींवर प्रदीर्घ चर्चा झाली. US Iran War : पेझेशकियान यांनी प्रादेशिक स्थिरतेसाठी पाकिस्तानच्या भूमिकेची प्रशंसा केली. २८ फेब्रुवारी रोजी अमेरिका-इस्रायलने केलेल्या हल्ल्यानंतर ८ एप्रिल रोजी पाकिस्तानच्या मध्यस्थीने दोन्ही देशांत तात्पुरता युद्धविराम झाला होता. मात्र, त्यानंतर झालेली शांतता चर्चा अनिर्णायक ठरली आहे. हा दौरा अशा वेळी होत आहे, जेव्हा अमेरिकेचे राष्ट्राध्यक्ष डोनाल्ड ट्रम्प यांनी इशारा दिला आहे की, करार मान्य न झाल्यास पुन्हा हल्ले सुरू करण्यासाठी काही दिवसांचीच मुदत दिली जाईल. दुसरीकडे, इराणचे परराष्ट्र मंत्री अराघची यांनीही, युद्धाकडे परतल्यास जगात अनेक अनपेक्षित संकटे उभी राहतील, असा सज्जड दम दिला आहे. तसेच, इराणवर पुढील हल्ला झाल्यास या संघर्षाची व्याप्ती पश्चिम आशियाच्या सीमा ओलांडून जाईल, असा इशारा रिव्होल्युशनरी गार्ड्सने दिला आहे. अशा अत्यंत स्फोटक परिस्थितीत पाकिस्तान दोन कट्टर शत्रूंमधील दरी सांधण्यासाठी अथक प्रयत्न करत आहे.
