PAK vs BAN Pakistan beat Bangladesh : आशिया कप 2025 च्या सुपर फोर टप्प्यातील पाचव्या सामन्यात पाकिस्तानने बांगलादेशचा 11 धावांनी पराभव करत अंतिम फेरीत प्रवेश केला. दुबई आंतरराष्ट्रीय क्रिकेट स्टेडियमवर झालेल्या या सामन्यात पाकिस्तानने प्रथम फलंदाजी करत 20 षटकांत 8 गडी गमावून 135 धावा केल्या होत्या. प्रत्युत्तरात बांगलादेशचा संघ 9 बाद 124 धावांच करु शकला.

या सामन्यात पाकिस्तानला खराब सुरुवातीनंतर खालच्या फळीतील फलंदाजांनी संघाला सावरले, तर गोलंदाजांनी उत्कृष्ट कामगिरी करत विजय मिळवला. या पराभवासह बांगलादेशचा संघ स्पर्धेतून बाहेर पडला. विशेष म्हणजे आशिया कपच्या 41 वर्षांच्या इतिहासात प्रथमच भारत आणि पाकिस्तान फायनल सामन्यात आमनेसामने आले आहेत.

पाकिस्तानची खराब सुरुवात पण खालच्या फळीने सावरले –

नाणेफेक हरल्यानंतर प्रथम फलंदाजीला उतरलेल्या पाकिस्तानची सुरुवात अत्यंत खराब झाली. अवघ्या 49 धावांवर त्यांनी 5 गडी गमावले. मात्र, खालच्या फळीतील फलंदाजांनी जबाबदारीने फलंदाजी करत संघाला 135 धावांपर्यंत पोहोचवले. मोहम्मद हारिसने सर्वाधिक 31 धावा (2 चौकार, 1 षटकार) केल्या, तर मोहम्मद नवाझने 25, शाहीन शाह आफ्रिदीने 13 चेंडूत 19 आणि फाहिम अशरफने 14 धावांचे योगदान दिले. बांगलादेशकडून तस्कीन अहमदने 3 गडी टिपले, तर रिशाद हुसैन आणि मेहेदी हसन यांनी प्रत्येकी 2 गडी बाद केले. मुस्तफिजुर रहमानने 1 गडी बाद केला.

हेही वाचा – PAK vs BAN : पाकिस्तानची लाजिरवाणी चूक; गल्ली क्रिकेटमधील मुलेही करणार नाहीत, पाहा VIDEO

पाकिस्तानला गोलंदाजांनी मिळवून दिला विजय –

136 धावांच्या लक्ष्याचा बचाव करताना पाकिस्तानच्या गोलंदाजांनी शानदार कामगिरी केली. शाहीन शाह आफ्रिदीने पहिल्याच षटकात परवेझ हुसैन इमॉनला शून्यावर बाद करत बांगलादेशला पहिला धक्का दिला. त्यानंतर तौहीद हृदोयला बाद करत दुसरी विकेट मिळवली. हारिस रौफने तिसरा धक्का देत बांगलादेशची अवस्था बिकट केली. बांगलादेशचा अर्धा संघ 63 धावांवर गारद झाला.

हेही वाचा – Jasprit Bumrah : भारताच्या ‘या’ माजी क्रिकेटपटूवर संतापला बुमराह! चुकीची माहिती पसरवल्याचा केला आरोप

त्यांच्या पहिल्या पाच फलंदाजांपैकी कोणीही 20 धावांचा टप्पा गाठू शकला नाही. परिणामी, बांगलादेशला 20 षटकांत 9 गडी गमावून केवळ 124 धावाच करता आल्या आणि त्यांना 11 धावांनी पराभव पत्करावा लागला. पाकिस्तानकडून सैम अयूबने 4 षटकांत केवळ 16 धावा देत 2 गडी बाद केले, तर शाहीन शाह आफ्रिदीने 4 षटकांत 17 धावा देत 3 गडी बाद केले. या विजयासह पाकिस्तानने अंतिम फेरीत धडक मारली, तर बांगलादेशचे स्पर्धेतील आव्हान संपुष्टात आले.