पहलगाम/मुंबई : जम्मू-कश्मीरमधील पहलगाम येथील बैसरन व्हॅलीमध्ये मंगळवारी (22 एप्रिल 2025) दहशतवाद्यांनी पर्यटकांवर केलेल्या क्रूर हल्ल्याने संपूर्ण देश हादरला आहे. या हल्ल्यात महाराष्ट्रातील दोन पर्यटक, दिलीप डिसले आणि अतुल मोने यांचा मृत्यू झाला, तर पनवेलचे माणिक पटेल आणि एस. भालचंद्र राव जखमी झाले आहेत. पुण्यातील एका कुटुंबावरही दहशतवाद्यांनी धर्म विचारून गोळीबार केल्याची धक्कादायक माहिती समोर आली आहे. सूत्रांनुसार, या हल्ल्यात 27 हून अधिक जणांचा मृत्यू झाल्याची भीती आहे, तर अनेक जण जखमी आहेत. लष्कर-ए-तैयबाशी संबंधित ‘द रेझिस्टन्स फ्रंट’ (TRF) या दहशतवादी संघटनेने हल्ल्याची जबाबदारी स्वीकारली आहे.

महाराष्ट्रातील पर्यटकांचा बळी, मुख्यमंत्र्यांचा निषेध
महाराष्ट्राचे मुख्यमंत्री देवेंद्र फडणवीस यांनी या भ्याड हल्ल्याचा तीव्र निषेध व्यक्त केला आहे. त्यांनी जम्मू-कश्मीरचे विभागीय आयुक्त विजयकुमार बिदरी यांच्याशी संपर्क साधून घटनेची सविस्तर माहिती घेतली. फडणवीस म्हणाले, “या हल्ल्याचा मी तीव्र निषेध करतो. मृत्यूमुखी पडलेल्यांना भावपूर्ण श्रद्धांजली. जखमींच्या प्रकृतीत लवकर सुधारणा होण्यासाठी प्रार्थना. जम्मू-कश्मीर प्रशासनाला सर्वतोपरी मदत केली जाईल. दहशतवाद्यांचा नायनाट होईपर्यंत आम्ही थांबणार नाही.” जखमी माणिक पटेल आणि एस. भालचंद्र राव यांची प्रकृती स्थिर असल्याची माहिती काश्मीर प्रशासनाने दिली आहे.

पुण्यातील कुटुंबावर क्रूर हल्ला
पुण्यातील पाच जणांचे कुटुंब (दोन पुरुष आणि तीन महिला) पहलगामला पर्यटनासाठी गेले होते. अनंतनाग जिल्ह्यातील बैसरन व्हॅलीमध्ये काश्मीरी पोषाखात फोटो काढत असताना दहशतवादी अचानक समोर आले. प्रत्यक्षदर्शींनुसार, दहशतवाद्यांनी पर्यटकांची नावे आणि धर्म विचारला. गोळीबार सुरू केला. या कुटुंबातील दोन पुरुषांवर गोळ्या झाडण्यात आल्या. यापैकी एकाला तीन गोळ्या लागल्या असून त्याची प्रकृती गंभीर आहे, तर दुसरा पुरुषही जखमी आहे.

TRF ची कबुली
हल्लेखोरांनी पोलिस आणि सैन्याच्या गणवेशात येऊन पर्यटकांवर अंदाधुंद गोळीबार केला. प्रत्यक्षदर्शींनी सांगितले की, दहशतवाद्यांनी पर्यटकांचा धर्म विचारला आणि हिंदूंना लक्ष्य केले. काही पर्यटकांना कपडे काढून तपासणी केल्याचीही माहिती आहे. TRF ने हल्ल्याची जबाबदारी स्वीकारताना हा हल्ला पर्यटन आणि काश्मीरच्या अर्थव्यवस्थेला खीळ घालण्यासाठी केल्याचे म्हटले आहे. हल्ल्यातील मृतांमध्ये दोन परदेशी आणि दोन स्थानिकांचा समावेश आहे.

सुरक्षा यंत्रणांचे सर्च ऑपरेशन, हेल्पलाइन जारी
हल्ल्याची माहिती मिळताच भारतीय सैन्य, जम्मू-कश्मीर पोलीस, सीआरपीएफ आणि विशेष दले यांनी बैसरन व्हॅलीला घेराव घालून सर्च ऑपरेशन सुरू केले. हल्लेखोर 4 ते 6 जण असल्याचा संशय असून, त्यापैकी तीन परदेशी आणि एक स्थानिक दहशतवादी असल्याची माहिती गुप्तचर यंत्रणांनी दिली. जखमींना हेलिकॉप्टर आणि घोड्यांद्वारे रुग्णालयात हलवण्यात आले. जम्मू-कश्मीर सरकारने हेल्पलाइन क्रमांक जारी केले आहेत:
श्रीनगर: 0194-2457543, 0194-2483651

आदिल फरीद, एडीसी श्रीनगर: 7006058623

पंतप्रधानांचा कठोर इशारा, अमित शाह श्रीनगरला
पंतप्रधान नरेंद्र मोदी यांनी सौदी अरब दौऱ्यावर असताना गृहमंत्री अमित शाह यांच्याशी फोनवर चर्चा करून कठोर कारवाईचे निर्देश दिले. मोदी म्हणाले, “या जघन्य कृत्याला जबाबदार असणाऱ्यांना सोडले जाणार नाही. दहशतवाद्यांचा नापाक हेतू कधीही यशस्वी होणार नाही.” शाह श्रीनगरला पोहोचले असून, सर्व यंत्रणांसह सुरक्षा आढावा बैठक घेत आहेत.

अमरनाथ यात्रेपूर्वी चिंता
हा हल्ला पर्यटन हंगामाच्या शिगेला आणि 3 जुलै 2025 पासून सुरू होणाऱ्या अमरनाथ यात्रेच्या तयारीदरम्यान झाला आहे. पहलगाम हा यात्रेचा मुख्य तळ असल्याने सुरक्षा व्यवस्थेवर प्रश्नचिन्ह उपस्थित झाले आहे. काश्मीर खोऱ्यातील पर्यटनाला लक्ष्य करून स्थानिक अर्थव्यवस्थेला हानी पोहोचवण्याचा दहशतवाद्यांचा डाव असल्याचे गुप्तचर यंत्रणांचे मत आहे.

राजकीय नेत्यांचा निषेध
काँग्रेस अध्यक्ष मल्लिकार्जुन खर्गे, माजी मुख्यमंत्री मेहबुबा मुफ्ती, ओमर अब्दुल्ला, तमिळनाडूचे मुख्यमंत्री एम.के. स्टॅलिन, उत्तर प्रदेशचे मुख्यमंत्री योगी आदित्यनाथ आणि राष्ट्रपती द्रौपदी मुर्मू यांनी हल्ल्याचा तीव्र निषेध केला आहे. खर्गे म्हणाले, “हा क्रूर हल्ला मानवतेवर कलंक आहे. सरकारने ठोस पावले उचलावीत.” मुफ्ती यांनी सखोल चौकशीची मागणी केली.

या हल्ल्याने काश्मीरमधील पर्यटन आणि शांततेच्या प्रयत्नांना मोठा धक्का बसला आहे. सुरक्षा यंत्रणा हाय अलर्टवर असून, नागरिकांना सतर्क राहण्याचे आवाहन करण्यात आले आहे.