Vijaya Shanti : बॅालिवूडमधील अनेक कलाकारांनी टॅालिवूडमध्ये आपला एक मोठा चाहतावर्ग तयार केला आहे. जसे बॅालिवूडमधील कलाकारांना टॅालिवूडमध्ये काम करण्याची संधी मिळते. तशीच टॅालिवूडमधील कलाकार देखील बॅालिवूडमध्ये काम करताना दिसतात. गेल्या कैक वर्षांपासून हे सुरू आहे.

१९९४ मध्ये बॅालिवूडमध्ये असा की एक चित्रपट आला होता. त्या चित्रपटाचं नाव होतं तेजस्विनी. या चित्रपटात पोलीस अधिकाऱ्याच्या भूमिकेत दिसलेली अभिनेत्री विजया शांती. खरंतर या अभिनेत्रीने बॅालिवूडमध्ये काही मोजक्याच चित्रपटात काम केलं; पण तिचा तेजस्विनी चित्रपटातील अभिनय सगळ्यांनाच भावला. चित्रपटातील केवळ तिचाच अभिनय भाऊ खाऊन गेला.

आज २४ जून रोजी आपल्या दमदार अभिनयाने स्वतंत्र ओळख निर्माण करणाऱ्या अभिनेत्री विजया शांती यांचा ६० वा वाढदिवस असून, या अभिनेत्रीने वयाच्या अवघ्या १३ व्या वर्षी अभिनय क्षेत्रात पाऊल ठेवत केवळ लोकप्रिय अभिनेत्री म्हणूनच नव्हे, तर ‘लेडी सुपरस्टार’ आणि ‘लेडी अमिताभ’ अशी बिरुदे मिळवत सिनेसृष्टीत वेगळा ठसा उमटवला. त्यांची कारकीर्द जाणून घेऊयात…

हेही वाचा : Nirav Modi : ‘बँकेचे पैसे परत करा!’ ; नीरव मोदीवर ब्रिटिश न्यायालयाचा कठोर बडगा, दंड अन् तुरुंगवासाचीही शिक्षा

२०० हून अधिक चित्रपटांमध्ये काम  (Vijaya Shanti )

विजया शांती यांचा अभिनय प्रवास तमिळ चित्रपट ‘कल्लुक्कुल ईरम’मधून सुरू झाला. त्यानंतर त्यांनी तेलुगू चित्रपट ‘खिलाडी कृष्णुडू’मध्ये झळकून प्रेक्षकांचे लक्ष वेधले. चित्रपटांमधील वाढत्या व्यस्ततेमुळे त्यांना दहावीनंतर शिक्षण थांबवावे लागले, मात्र अभिनय क्षेत्रातील त्यांची घोडदौड कधीच थांबली नाही. चार दशकांहून अधिक काळाच्या कारकिर्दीत त्यांनी तेलुगू, तमिळ, हिंदी, कन्नड आणि मल्याळम भाषांतील 200 हून अधिक चित्रपटांमध्ये काम केले. रोमँटिक भूमिकांपासून ते महिला सक्षमीकरणाचा संदेश देणाऱ्या ताकदीच्या व्यक्तिरेखांपर्यंत विविध भूमिका त्यांनी प्रभावीपणे साकारल्या.

बॉक्स ऑफिसवर विक्रमी यश   (Vijaya Shanti )

1980 आणि 1990 च्या दशकात त्यांची लोकप्रियता शिखरावर होती. अनेक चित्रपटांमध्ये कथानक त्यांच्या भूमिकांभोवती फिरत असे. ॲक्शन, भावनिक प्रसंग आणि दमदार संवादफेकीमुळे त्यांनी प्रेक्षकांच्या मनावर अधिराज्य गाजवले. याच काळात त्यांना ‘लेडी अमिताभ’ हे विशेष टोपणनाव मिळाले. त्यांच्या अनेक चित्रपटांनी बॉक्स ऑफिसवर विक्रमी यश मिळवले. अभिनयातील योगदानासाठी त्यांना राष्ट्रीय पुरस्कारासह अनेक नंदी पुरस्कारांनी गौरविण्यात आले.

तेजस्विनीच्या भूमिकेने वेधले लक्ष 

विजया शांती यांनी बॅालिवूडमध्ये काही मोजक्याच चित्रपटांत काम केले. मात्र, त्या तेजस्विनी या चित्रपटातील भूमिकेमुळे अनेकांच्या लक्षात राहिल्या. १९९४ मध्ये प्रदर्शित झालेल्या या चित्रपटाने बॅाक्स अॅाफिस गाजवलं. विजया शांती यांनी तेजस्विनी ही पोलीस अधिकाऱ्याची व्यक्तिरेखा साकारली होती. अभिनेत्रीने तिचा जबरदस्त अभिनयाने सर्वांचे लक्ष वेधून घेतलं. हा चित्रपट पुढे टेलिव्हिजनवर आल्यावर मोठं कौतुक करण्यात आलं होतं.

राजकीय कारकीर्द 

चित्रपटसृष्टीतील यशानंतर विजया शांती यांनी राजकारणात प्रवेश केला. १९९८ मध्ये त्यांनी भाजपमधून राजकीय कारकिर्दीची सुरुवात केली. त्यानंतर तेलंगणा राज्याच्या चळवळीत सक्रिय सहभाग घेत त्यांनी २००५ मध्ये ‘तल्ली तेलंगणा’ पक्षाची स्थापना केली. पुढे हा पक्ष टीआरएसमध्ये विलीन झाला आणि त्या तेलंगणा आंदोलनातील महत्त्वाच्या नेत्या बनल्या. २००९ मध्ये मेडक मतदारसंघातून लोकसभा निवडणूक जिंकत त्यांनी संसदेत प्रवेश केला. त्यांच्या राजकीय प्रवासात भाजप, टीआरएस आणि काँग्रेस अशा विविध पक्षांमधील भूमिका पाहायला मिळाल्या. २०२३ मध्ये त्यांनी पुन्हा काँग्रेसमध्ये प्रवेश केला.

लोकप्रियता आजही कायम

आज त्या चित्रपटांमध्ये कमी प्रमाणात दिसत असल्या तरी त्यांची लोकप्रियता आणि चाहतावर्ग कायम आहे. दक्षिण भारतीय चित्रपटसृष्टीत आपल्या जोरावर चित्रपट हिट करणाऱ्या मोजक्या अभिनेत्रींपैकी एक म्हणून त्यांचे नाव आदराने घेतले जाते. संघर्ष, यश आणि जिद्दीचा त्यांचा प्रवास आजही अनेकांना प्रेरणा देत आहे.

हेही वाचा : Sunil Pal On Alia Bhatt: “जहां है गालियां, वहां है आलिया”; समय रैनाच्या शोमध्ये जाताच आलिया भट्टवर टीका