Nilesh Rane VS Gunratna Sadavarte : महाराष्ट्राच्या राजकारणात भाजप आणि शिवसेनेतील नेत्यांच्या वक्तव्यांमुळे मोठा संघर्ष निर्माण झाला आहे. दोन्ही बाजूंच्या नेत्यांमध्ये शाब्दिक चकमक थांबण्याचे नाव घेत नाहीये. शिवसेनेचे आमदार निलेश राणे आणि भाजप प्रवक्ते नवनाथ बन यांच्यातील वादाच्या पार्श्वभूमीवर आता गुणरत्न सदावर्ते यांच्या दाव्याने राजकीय वातावरण चांगलेच तापले आहे.

एकनाथ शिंदे पुन्हा मुख्यमंत्री होणारच नाहीत, असा मोठा दावा गुणरत्न सदावर्ते यांनी केला आहे. त्यावर निलेश राणे यांनी थेट आव्हान देत आपली भूमिका स्पष्ट केली. आज सकाळी पत्रकार परिषदेत गुणरत्न सदावर्ते यांनी एकनाथ शिंदे मुख्यमंत्री होणारच नाहीत, असे भाकीत वर्तवले. त्यांच्या या भाकिताचा समाचार घेत निलेश राणे यांनी सदावर्ते यांच्या दाव्याला जोरदार प्रत्युत्तर दिले.

नेमकं काय म्हणाले निलेश राणे?

निलेश राणे म्हणाले, “एकनाथ शिंदे २०२२ मध्ये पहिल्यांदा मुख्यमंत्री झाले. त्याआधीही अनेक जण म्हणत होते की ते मुख्यमंत्री होणार नाहीत. मात्र, ते मुख्यमंत्री झालेच. भविष्यवाणी सांगून महाराष्ट्र चालतो का?”

पुढे त्यांनी शिवसेनेच्या राजकीय ताकदीचा उल्लेख केला. ते म्हणाले “आज आमच्याकडे खासदार, आमदार आणि शेकडो नगरसेवक आहेत. अशा परिस्थितीत आमचा नेता मुख्यमंत्री होणार नाही तर कधी होणार? महाराष्ट्रात दुसऱ्या क्रमांकाचा पक्ष आमची शिवसेना आहे. एकनाथ शिंदे मुख्यमंत्री होणारच नाहीत असे कोणी सांगितले तर लिहून द्या, नाही झाले तर आमची सगळी प्रॉपर्टी सोडून देतो.” असे खुले आव्हान निलेश राणे यांनी दिले.

शिंदे पुन्हा मुख्यमंत्री व्हावेत, ही इच्छा

एकनाथ शिंदे पुन्हा महाराष्ट्राचे मुख्यमंत्री व्हावेत, अशी आपली वैयक्तिक इच्छा असल्याचेही निलेश राणे यांनी सांगितले. एकनाथ शिंदे यांनी मुख्यमंत्री म्हणून यशस्वी कार्यकाळ पूर्ण केला असून त्यांना पुन्हा या पदावर पाहायला आवडेल, असे ते म्हणाले.

यावेळी त्यांनी देवेंद्र फडणवीस यांचाही उल्लेख केला. फडणवीस हे वरिष्ठ नेते असून ते आपलेही नेते आहेत. मात्र, एक शिवसैनिक आणि कार्यकर्ता म्हणून एकनाथ शिंदे यांनी पुन्हा मुख्यमंत्री व्हावे, अशी आपली इच्छा असल्याचे निलेश राणे यांनी स्पष्ट केले.

Mrunal Thakur : मृणाल ठाकूरचा साडीतील सुंदर लुक; चाहत्यांकडून कौतुकाचा वर्षाव