Beed – बीडमधील भाजपचा पदाधिकारी आणि आमदार सुरेश धस यांचा कार्यकर्ता असलेल्या सतीश भोसले उर्फ खोक्या भाईचे एकापाठोपाठ एक कारनामे पुढे येत आहे. बॅटने अमानुष मारहाण तसेच शिकारीत आडवे येणाऱ्या ढाकणे पिता-पुत्रांना मारहाण केल्याच्या प्रकरणात फरार असलेला सतीश भोसले उर्फ खोक्याभाई तिसऱ्या दिवशीही पोलिसांना सापडलेला नाही. वन विभागाने शनिवारी त्याच्या घराची झाडाझडती घेतली. त्यात अधिकाऱ्यांना हरणांसारख्या वन्य प्राण्यांना पकडण्यासाठी लागणारे सापळे व इतर सामग्री हाती लागली. यामुळे त्याच्यावर हरणाची शिकार करून मांस खाण्याचे आरोप केले जात आहेत. याच प्रकरणात ओबीसी नेते टी. पी. मुंडे यांनी आमदार सुरेश धसांवर आरोप केले आहेत.

सतीश भोसले उर्फ खोक्या याने मारलेल्या हरणांचे मटण भाजप आमदार सुरेश धस यांना पोहोचते केले जात असल्याचा खळबळजनक आरोप ओबीसी नेते टी. पी. मुंडे यांनी केला आहे. त्यांच्या या आरोपामुळे धस यांच्या अडचणींत मोठी भर पडण्याची शक्यता आहे.

सुरेश धसांविरोधात मुख्यमंत्र्यांना भेटणार –

टी पी मुंडे म्हणाले की, सतीश उर्फ खोक्या भोसलेने शिरूर तालुक्यातील वनक्षेत्र परिसरात 200 हून अधिक वन्यप्राण्यांची शिकार केली आहे. त्यात हरणांचा मोठ्या प्रमाणात समावेश आहे. तो शिकार केलेल्या हरणांचे मांस आमदार सुरेश धस यांना पोहोचते करत होता. त्याला धस यांचे अभय आहे. त्यामुळे त्याच्यावर कोणताही गुन्हा दाखल होत नाही.

हा खोक्या व त्याचे सहकारी हरणांचे मांस दोन-चार किलोच्या डब्ब्यांत भरून धस यांना नेऊन देत होते. आमदार धस यांच्या बाबतीत असे होत असेल तर भोसलेवर गुन्हे कसे दाखल होतील? मी या प्रकरणी राज्याच्या वनमंत्र्यांची भेट घेणार आहे. एवढेच नाही तर मंगळवारी मी राज्याचे मुख्यंमत्री देवेंद्र फडणवीस यांची भेट घेऊन त्यांच्याही कानावर मी ही गोष्ट घालणार आहे.

सुरेश धस यांना सहआरोपी करण्याची गरज –

वन्य प्राण्यांची शिकार करून त्यांच्या मांसाची तस्करी केल्याप्रकरणी सुरेश धस यांना सहआरोपी करण्याची गरज आहे. ते दुसऱ्यांना आका म्हणतात. पण, ते स्वतःही आकांचे आका आहेत. त्यांच्याकडे वाल्मीक कराडहून जास्त गुन्हेगार आहेत. हरीण, डुक्कर व अन्य वन्य प्राण्यांच्या तस्करीवर बंदी असतानाही अशा प्रकारच्या लोकांच्या माध्यमातून मांसाची तस्करी करणे हा गुन्हाच आहे. त्यामुळे पहिल्यांदा धस यांच्यावर गुन्हा दाखल झाला पाहिजे. आम्ही यासंबंधी रविवारी शिरूर येथे भव्य मोर्चा काढणार आहोत, असे ते म्हणाले.

खोक्याच्या घरातून वाळलेले मांस जप्त –

दुसरीकडे, बीड पोलिसांनी फरार सतीश भोसलेचा शोध घेण्यासाठी युद्धपातळीवर हालचाली सुरू केल्या आहेत. शिरूर कासार पोलिस व वन विभागाने केलेल्या संयुक्त कारवाईत सतीश भोसलेच्या घरातून वन्य प्राण्यांचे वाळलेले मांस जप्त करण्यात आले आहे. हे मांस कोणत्या प्राण्याचे आहे हे अद्याप स्पष्ट झाले नाही. पण ते एका महिन्यापूर्वीचे असल्याची प्राथमिक माहिती आहे. पोलिस या मांसाची न्यायवैद्यक तपासणी करणार आहेत.