Champions Trophy 2025 : न्यूझीलंडने दक्षिण आफ्रिकेचा ५० धावांनी पराभव करत चॅम्पियन्स ट्रॉफी २०२५ च्या अंतिम फेरीत प्रवेश केला. आता चॅम्पियन्स ट्रॉफीच्या विजेतेपदाच्या लढतीत त्यांचा सामना भारताशी होणार आहे. हा सामना ९ मार्च (रविवार) रोजी दुबईत होणार आहे. दक्षिण आफ्रिकेविरुद्ध झालेल्या सामन्यात नाणेफेक जिंकून प्रथम फलंदाजीला आलेल्या न्यूझीलंडने रचिन रवींद्र आणि केन विल्यमसन यांच्या शतकी खेळीच्या जोरावर ५० षटकांत ६ गडी गमावून ३६२ धावा केल्या होत्या. चॅम्पियन्स ट्रॉफीच्या इतिहासातील ही सर्वात मोठी धावसंख्या ठरली. प्रत्युत्तरात दक्षिण आफ्रिकेला निर्धारित षटकांत ९ गडी गमावून ३१२ धावा करता आल्या. त्यांच्याकडून डेव्हिड मिलरने नाबाद शतक झळकावले. दक्षिण आफ्रिकेची खराब सुरुवात – या सामन्यात लक्ष्याचा पाठलाग करताना दक्षिण आफ्रिकेची सुरुवात खराब झाली. त्यांना पहिला धक्का मॅट हेन्रीने रायन रिकेल्टनच्या रूपाने बसला. जो केवळ १७ धावा करू शकला. यानंतर कर्णधार टेम्बा बावुमा आणि रॅसी व्हॅन डर डुसेन यांनी पदभार स्वीकारला. या दोघांमध्ये दुसऱ्या विकेटसाठी १०५ चेंडूत १०५ धावांची भागीदारी झाली. दरम्यान, किवीजकडून मिचेल सँटनरने तीन, तर मॅट हेन्री आणि ग्लेन फिलिप्सने प्रत्येकी दोन विकेट्स घेतल्या. मिचेल सँटनरने बावुमाला केन विल्यमसनकरवी झेलबाद केले. तो ७१ चेंडूत ५६ धावा करून तो बाद झाला. त्याचवेळी ड्युसेन चार चौकार आणि दोन षटकारांच्या मदतीने ६९ धावा करून पॅव्हेलियनमध्ये परतला. यानंतर संघाला चांगल्या भागीदारीची गरज होती, पण त्यांच्या मधल्या फळीने निराशा केली. दक्षिण आफ्रिकेच्या मधल्या फळीकडून निराशा – उपांत्य फेरीच्या सामन्यात डेव्हिड मिलरने ६७ चेंडूत नाबाद १०० धावा केल्या. त्याचे आंतरराष्ट्रीय कारकिर्दीतील हे सहावे वनडे शतक आहे. त्यांच्याशिवाय एडन मार्करामने ३१, हेनरिक क्लासेनने तीन, वियान मुल्डरने आठ, मार्को जॅनसेनने तीन, केशव महाराजने एक, कागिसो रबाडाने १६ आणि लुंगी एनगिडी एका धावावर नाबाद राहिला. किवीजकडून मिचेल सँटनरने तीन तर मॅट हेन्री आणि ग्लेन फिलिप्सने प्रत्येकी दोन विकेट्स घेतल्या. तत्पूर्वी या सामन्यात सलामीवीर रचिन रवींद्र आणि केन विल्यमसन यांच्या शतकांच्या जोरावर न्यूझीलंडने दक्षिण आफ्रिकेविरुद्ध या स्पर्धेच्या इतिहासातील सर्वोच्च धावसंख्या उभारली. आता लाहोरहून न्यूझीलंडचा संघ लवकरात लवकर दुबईला रवाना होणार आहे. यासह स्पर्धेचा पाकिस्तानमधील टप्पाही संपला.
