NZ vs PAK Hasan Nawaz fastest T20I century for Pakistan : पाकिस्तानी संघाने न्यूझीलंडविरुद्धचा तिसरा टी-२० सामना ९ विकेट्सने शानदार पद्धतीने जिंकला आहे. हसन नवाझ पाकिस्तानी संघासाठी सर्वात मोठा हिरो म्हणून उदयास आला आहे. हसन आणि मोहम्मद हॅरिसच्या फलंदाजीसमोर न्यूझीलंडचे गोलंदाज टिकू शकले नाहीत. सामन्यात प्रथम फलंदाजी करताना न्यूझीलंडने २०४ धावा केल्या होत्या. प्रत्युत्तरात पाकिस्तानने हे लक्ष्य १६ षटकांत १ गडी गमावून गाठले. या सामन्यात हसन नवाजने मोठा पराक्रम केला.

हसन नवाझने पाकिस्तानसाठी रचला इतिहास –

हसन नवाझने डावाच्या सुरुवातीपासूनच स्फोटक फलंदाजी केली. त्याने मोहम्मद हॅरिससोबत ७४ धावांची भागीदारी केली आणि पाकिस्तानच्या विजयाचा पाया रचला. हसनने फक्त ४४ चेंडूत शतक झळकावले. यासह, तो पाकिस्तानी संघासाठी टी-२० आंतरराष्ट्रीय क्रिकेटमध्ये सर्वात जलद शतक करणारा फलंदाज बनला आहे आणि त्याने बाबर आझमचा विक्रम मोडला आहे. बाबरने २०२१ मध्ये, दक्षिण आफ्रिकेविरुद्धच्या टी-२० सामन्यात ४९ चेंडूत शतक झळकावले होते. टी-२० आंतरराष्ट्रीय क्रिकेटमध्ये सर्वात कमी चेंडूत शतक ठोकण्याच्या बाबतीत हसन नवाज आता सर्व पाकिस्तानी फलंदाजांना मागे टाकत पहिल्या क्रमांकावर पोहोचला आहे.

पाकिस्तान संघासाठी टी-२० क्रिकेटमध्ये सर्वात जलद शतक झळकावणारे फलंदाज:

https://twitter.com/TheRealPCB/status/1903013257201455369

हसन नवाझ – ४४ चेंडू
बाबर आझम – ४९ चेंडू
अहमद शहजाद – ५८ चेंडू
बाबर आझम – ५८ चेंडू

हेही वाचा – IPL 2025 चा हंगाम सुरु होण्यापूर्वी ‘या’ सामन्याचे बदलले ठिकाण, सुरक्षेच्या कारणास्तव घेतला ‘हा’ निर्णय

कारकिर्दीतील तिसऱ्या टी-२० सामन्यात केला मोठा धमाका –

हसन नवाज फक्त २२ वर्षांचा आहे आणि त्याने न्यूझीलंड दौऱ्यादरम्यान पाकिस्तानी संघासाठी टी-२० आंतरराष्ट्रीय पदार्पण केले. तो त्याच्या कारकिर्दीच्या पहिल्या दोन सामन्यात शून्यावर बाद झाला होता, पण तिसऱ्या टी-२० सामन्यात त्याने अशी फलंदाजी केली की त्याचे नाव इतिहासाच्या पानांवर नोंदवले गेले. तिसऱ्या सामन्यातच शतक झळकावून त्याने आपली छाप सोडली आहे.