जालना  – मराठा आरक्षणाच्या मागणीकडे राज्य सरकारचे लक्ष वेधण्यासाठी मराठा आंदोलकांचे नेते मनोज जरांगे आणि इतर हजारो जणांनी शनिवारी महाराष्ट्रातील जालना जिल्ह्यातून मुंबईच्या दिशेने आपला मोर्चा सुरू केला आहे. मराठा आरक्षणासाठी शेवटच्या श्‍वासापर्यंत लढण्याची शपथ त्यांनी घेतली आहे.

मोर्चाला सुरुवात करण्यापूर्वी पत्रकारांशी बोलताना जरांगे यांनी सरकारच्या “क्रूर आणि असंवेदनशील” वृत्तीबद्दल आणि मराठा आरक्षणाचा प्रश्न सोडवण्यात अपयशी ठरल्याबद्दल जोरदार टीका केली आणि शेवटच्या श्वासापर्यंत लढा सुरू ठेवण्याची शपथ घेतली.जरांगे यांच्या मूळ अंतरवाली सराटी गावातून सकाळी अकराच्या सुमारास निषेध मोर्चाला सुरुवात झाली.

असंख्य समर्थकांनी मुंबईच्या दिशेने कुच केली. मराठा समाजाने सरकारला आरक्षण देण्यासाठी सात महिन्यांचा कालावधी दिला, मात्र तरीही कोणतीही कारवाई झाली नाही, असे त्यांनी पत्रकारांशी बोलताना सांगितले.माझ्या शेवटच्या श्वासापर्यंत मी आंदोलन सुरूच ठेवणार आहे. जोपर्यंत आरक्षणाची मागणी पूर्ण होत नाही तोपर्यंत मी मागे हटणार नाही, असे भावनिक उद्‌गार जरांगे यांनी यावेळी काढले. मराठा तरुणांच्या आत्महत्येत भयानक वाढ झाल्याचा उल्लेख करत त्यांनी राज्य सरकार आणि मंत्र्यांवर टीका केली.

ते म्हणाले की, आरक्षणाच्या मुद्द्यावरून मराठा तरुण आपले जीवन संपवत आहेत, पण सरकार बिनबोभाट आहे. सरकार इतके असंवेदनशील आणि क्रूर कसे आहे आणि ते केवळ मराठा तरुणांच्या आत्महत्या पाहत आहेत असे ते म्हणाले. यावेळी त्यांनी एक प्रसंग सांगितला ज्यात छत्रपती संभाजीनगर जिल्ह्यातील पैठण येथील मराठा समाजातील एका व्यक्तीने त्यांना सांगितले की, आरक्षणासाठी त्यांच्या एकुलत्या एक मुलाने जीवन संपवले.

जरांगे म्हणाले की, मुंबईच्या वाटेवर उपोषण सुरू करायचे की महाराष्ट्राची राजधानी गाठल्यानंतर तेथे उपोषण सुरू करायचे या विषयी आपण समाजातील सदस्यांशी सल्लामसलत करू. जरांगे यांच्या नेतृत्वाखाली निघालेला निषेध मोर्चा २५ जानेवारीला मुंबईत पोहोचण्याची शक्यता आहे. अंतरवाली सराटी गाव ते मुंबई हे अंतर ४०० किलोमीटरहून अधिक आहे. या आंदोलनात मराठा समाजातील हजारो सदस्य जरंगे यांच्यासोबत आहेत. आंदोलक दररोज काही तास चालतील आणि वाहनांचाही वापर करतील. २६ जानेवारीपासून जरांगे मराठा कोट्याच्या मुद्द्यावरून उपोषण सुरू करणार आहेत.