श्रीनगर  – जम्मू-काश्‍मीर विधानसभा निवडणुकीतील दुसऱ्या टप्प्यासाठीची अधिसूचना केंद्रीय निवडणूक आयोगाने जारी केली. त्या टप्प्यात २६ मतदारसंघांमध्ये २५ सप्टेंबरला मतदान होईल.

अधिसूचना जारी झाल्याने दुसऱ्या टप्प्यात निवडणूक रिंगणात उतरणारे उमेदवार त्यांचे अर्ज दाखल करू शकतील. उमेदवारी अर्ज दाखल करण्याची अंतिम मुदत ५ सप्टेंबर आहे. त्या पुढील दिवशी उमेदवारी अर्जांची छाननी होईल. त्यानंतर ९ सप्टेंबरपर्यंत माघार घेऊ इच्छिणारे उमेदवार त्यांचे अर्ज मागे घेऊ शकतील. जम्मू-काश्‍मीरमध्ये एकूण ३ टप्प्यांत मतदान होईल.

सर्व टप्प्यांत मिळून मतदान करण्यास ८८ लाखांहून अधिक मतदार पात्र आहेत. जम्मू-काश्‍मीरमध्ये निवडणुकीसाठीची आचारसंहिता लागू होऊन १२ दिवस झाले. त्या कालावधीत ५.७१ कोटी रूपयांचा मुद्देमाल जप्त करण्यात आला. त्यामध्ये रोकड, मद्य आणि अंमली पदार्थांचा समावेश आहे.

मतदारांना आकर्षित करण्यासाठी विविध प्रकारची प्रलोभने दाखवली जातात. त्या गैरप्रकारांना आळा घालण्यासाठी विविध यंत्रणांकडून जप्तीची कारवाई केली जाते. जम्मू-काश्‍मीरमध्ये ती जबाबदारी पोलीस, एनसीबी आणि इतर यंत्रणांवर सोपवण्यात आली आहे.