Karad: पेपरफुटीविरोधात आक्रमक झालेले कराड तालुक्यातील शेकडो विद्यार्थी मंगळवारी रस्त्यावर उतरले. विद्यार्थ्यांनी कराड येथील दत्त चौकापासून तहसील कार्यालयावर आक्रोश मोर्चा काढून, जोरदार घोषणाबाजी केली. पेपरफुटी प्रकरणाचा तपास सीबीआयमार्फत करावा. मुख्य सूत्रधारासह सर्व दोषींना तात्काळ अटक करावी, अशा मागण्या त्यांनी केल्या.

आबासाहेब चव्हाण, सागर हुलवान, उदय गाडे, रणजित हराळे, लक्ष्मण बोराटे, श्रीकांत मेडशिंगे, योगेश धडाम, अक्षय वाघमारे आणि स्पर्धा परीक्षा मार्गदर्शन केंद्रचालकांच्या नेतृत्वाखाली सकाळी 10 वाजता मोर्चा सुरू झाला. शिवतीर्थ दत्त चौकात छत्रपती शिवाजी महाराजांच्या पुतळ्याला अभिवादन करुन, मोर्चा प्रशासकीय कार्यालयाकडे मार्गस्थ झाला. स्पर्धा परीक्षा देणार्‍या शेकडो विद्यार्थ्यांनी पेपरफुटीविरोधात जोरदार घोषणाबाजी केली. पेपरफुटीमुळे लाखो युवक-युवतींचे भवितव्य धोक्यात येत आहे. महाराष्ट्र लोकसेवा आयोगाचे पेपर वारंवार फुटणे आणि दोषींचा शोध योग्य पद्धतीने न होणे अशोभनीय असल्याची भावना विद्यार्थ्यांनी व्यक्त केली.

पेपरफुटी आणि शासकीय भरतीमधील गैरव्यवहारांच्या पारदर्शक, उच्चस्तरीय चौकशीसाठी सक्षम अधिकार्‍यांचे विशेष तपास पथक नेमावे, अथवा सीबीआयकडून तपास व्हावा. दोषींवर मोक्का अन्वये कारवाई करावी. पेपर फुटल्यामुळे रद्द झालेल्या परीक्षांचे शुल्क विद्यार्थ्यांना परत द्यावे, अशा मागण्या करण्यात आल्या. प्रांताधिकारी अतुल म्हेत्रे यांना निवेदन देण्यात आले.

शासकीय भरती परीक्षाआणि स्पर्धा परीक्षांचे पेपर फुटण्याच्या घटनांमध्ये वाढ झाली आहे. लाखो तरुण-तरुणी कर्ज काढून आणि अहोरात्र मेहनत करुन परीक्षांची तयारी करतात. मात्र, परीक्षेच्या वेळी किंवा निकालानंतर पेपर फुटल्याचे उघड होते. त्यामुळे प्रामाणिकपणे अभ्यास करणार्‍या विद्यार्थ्यांचे भवितव्य अंधारात असून, त्यांच्यामध्ये प्रचंड नैराश्य पसरले आहे.
आबासाहेब चव्हाण,
संचालक, विद्याप्रबोधिनी, कराड