वॉशिंग्टन :अमेरिकासारख्या पुढारलेल्या देशांमध्ये श्रद्धा आणि अंधश्रद्धा हा विषय कधी चर्चेला येत नाही, पण गेल्या काही कालावधीपासून अमेरिकेतील युवा पिढीचा ओढा ज्योतिषशास्त्राकडे वाढला आहे.  भारतीय तत्त्वज्ञानाचा भाग असलेल्या ज्योतिषशास्त्रावर आता अमेरिकेतील युवा पिढीचाही विश्वास बसत चालला असून लग्न संबंध टिकवण्यासाठी मुहूर्त पाहूनच लग्न केले जात आहे.
एवढेच नाही तर एखाद्या मुलाला किंवा मुलीला प्रपोज करण्यासाठी सुद्धा मुहूर्त शोधला जात आहे.  भारता सारख्या देशात ज्योतिषशास्त्राच्या आधारे कुंडली पाहूनच अद्यापही लग्न संबंध जुळवले जातात. परदेशात मात्र अशा प्रकारचा कोणताही ज्योतिषशास्त्रीय पाया नाही पण आता या भारतीय विचारसरणीचा अवलंब अमेरिकेतील युवकांनी सुद्धा करण्यास सुरुवात केली आहे.

अमेरिका आणि पाश्चिमात्य देशांमध्ये लग्न संबंध टिकवणे हे आव्हान झाल्यामुळे कोणत्याही प्रकारे हे संबंध टिकावेत यासाठी आता ज्योतिषशास्त्राचा आधार घेतला जात आहे. प्यु रिसर्च या संघटनेने केलेल्या संशोधनाप्रमाणे अमेरिकेतील 30 टक्के लोक आता ज्योतिषशास्त्रावर विश्वास ठेवू लागले आहेत.

वॉशिंग्टनमध्ये राहणारी एलीस बेल ही तरुणी सुद्धा ज्योतिषशास्त्राचा अभ्यास करते आणि आपल्या या अभ्यासाच्या आधारे तिने आतापर्यंत अनेकांना योग्य मुहूर्तावर लग्न करणे किंवा प्रपोज करण्याबाबत सल्ला दिला आहे. महिलावर्ग आणि तरुण मुली माझ्याकडे सल्ला मागण्यासाठी येत आहेत ते पाहता मला समाधान वाटत आहे असे तिने म्हटले आहे. एलिस ने ज्योतिषशास्त्रावर दोन पुस्तके लिहिली असून ती खूप लोकप्रिय झाली आहेत. एलिस बेल आणि तिच्याच प्रकारचे अनेक ज्योतिषी केवळ लग्नाचे किंवा प्रपोजलचे मुहूर्तच काढून देतात असे नव्हे तर युवक आणि युवती यांच्या कुंडल्या तपासून ते एकमेकांना योग्य आहेत की नाहीत याबाबतही सल्ला देण्याचे काम करता.