Pune rave party case : पुणे रेव्ह पार्टी प्रकरणामुळे राज्यभरात मोठी खळबळ उडाली आहे. या प्रकरणात माजी मंत्री आणि राष्ट्रवादी काँग्रेस शरद पवार गटाचे विधानपरिषदेचे आमदार एकनाथ खडसे यांच्या जावयासह सहा जणांना पोलिसांनी अटक केली आहे. आता या प्रकरणात एक धक्कादायक माहिती समोर आली आहे. खरंतर शनिवारी मध्यरात्री पुणे गुन्हे शाखेच्या पोलिसांनी खराडी येथील एका उच्चभ्रू सोसायटीतील फ्लॅटमध्ये हाऊस अॅाफ पार्टीच्या नावाखाली सुरू असलेल्या रेव्ह पार्टीवर धाड टाकली होती. मात्र, या रेव्ह पार्टीच्या आदल्या दिवशी शुक्रवारीही रेव्ह पार्टी झाली होती, अशी माहिती पोलिसांकडून देण्यात आली आहे. मिळालेल्या माहितीनुसार, एकनाथ खडसे यांचे जावई डॅा. प्राजंल खेवलकर यांच्या नावाने शुक्रवार ते रविवार दरम्यान हॅाटेल स्टेबर्ड सूटमध्ये रूम बुक करण्यात आली होती. याच ठिकाणी शुक्रवारी पार्टी झाली होती. त्यामुळे आता या प्रकरणात त्याबाबतही चौकशी केली जात आहे. तसेच पोलिसांकडून शुक्रवारच्या पार्टीतही अमली पदार्थांचे सेवन करण्यात आले होते का? याची देखील चौकशी केली जात आहे. हॉटेलमधील तीन दिवसांचे सीसीटीव्ही फुटेज पोलिसांनी मिळवले आहे. ससून रुग्णालयाच्या अहवालानुसार, डॅा. खेवलकर आणि श्रीपाद यादव यांनी पार्टीत मद्यप्राशन केल्याचे स्पष्ट झाले आहे. उर्वरित पाचही जणांचा रक्त व लघवी नमुना ससून रुग्णालयात तपासणीसाठी घेण्यात आले आहेत. लवकरच त्याचाही अहवाल येणार असल्याचे पोलिसांनी सांगितले. घरांची झाडाझडती पोलिसांनी या प्रकरणात अटकेत असलेल्या सातही जणांच्या घरांची झाडाझडती घेतली आहे. पोलिसांच्या या झाडाझडती दरम्यान कोणतेही अमली पदार्थ आढळले नाहीत. मात्र, पोलिसांनी मोबाईल, लॅपटॉप आणि मेमरी कार्ड जप्त केले आहेत. यामुळे आता तपासातून काय समोर येणार हे पाहावे लागणार आहे. आज न्यायालयात हजर केले जाणार पुणे रेव्ह पार्टी प्रकरणातील डॅा. प्राजंल खेवलकर यांच्यासह सहा आरोपींना आज पुन्हा न्यायालयात हजर केले जाणार आहे. त्यांची पोलीस कोठडी आज संपत आहे, त्यामुळे न्यायालयात या प्रकरणाची आज सुनावणी होणार आहे. यामुळे आज न्यायालयात कसा युक्तीवाद होतो हे पाहणे महत्वाचे असणार आहे.
